ମୋ କଥାକୁ ଭାବୁଥିବୁ
ମୋ କଥାକୁ ଭାବୁଥିବୁ
ବୟସ ହେଲାଣି ତିରିଶି ଉପରେ
ନାହିଁ ତୋ ମୁହଁକୁ ଲାଜ,
କାଳିଆ ମାଙ୍କେଡ଼ା ବୁଢାବର ପାଇଁ
ହେଉଛୁ ତୁ ସଜବାଜ
ଗାଆଁ ମୁଲକର ଗେହ୍ଲେଇ ଫୁଲେଇ
କପାଳ ଫାଟିଲା ତୋର,
ପାଚିଲା ବାଳରେ ସିନ୍ଦୁର ନାଇଲୁ
ଗଢିବାକୁ ପରିବାର
ନୟନ ତୋହର ହରିଣୀ ସମାନ
ସମସ୍ତଙ୍କୁ ଅଛି ଜଣା,
ଚାଳିଶି ବର୍ଷିଆ ଗେରସ୍ତଟା ମତେ
ଲାଗୁଛି ଅନ୍ଧାରକଣା
ମରହଟ୍ଟିଆ ସେ ମଫସଲ ଗାଆଁ
ଶାଶୁଘର ଦିନେ ହେବ,
ନଇ ଅତଡ଼ାରେ ଘଷି ପାରି ପାରି
ଅଧାପ୍ରାଣ ଚାଲିଯିବ
ନୁଆଁଣିଆ ଚାଳ ଝାଟିମାଟି କାନ୍ଥ
ଦେଖିଲେ ବେହୋସ ହେବୁ,
ସେତେବେଳେ ସଖୀ ମୁଣ୍ଡ ପିଟି ପିଟି
ମୋ କଥାକୁ ଭାବୁଥିବୁ ।