ମରଣ ଲେଖୁଛି ଗୀତ
ମରଣ ଲେଖୁଛି ଗୀତ
କବିତା ଗୋଟିଏ ଲେଖିଦେଲି ବୋଲି
ଥରିଗଲା ତୁମ ଦେହ
ପ୍ରିୟତମା ତୁମ ଆଖି ଆଇନାରେ
ଶୀତ ଦେଖୁଥିଲା ମୁହଁ I
ହସର ଲହଡି ଚଉଦିଗେ ଦେଖି
ତୁମ ମନହେଲା ଖୁସି
ଆଖି ଦରିଆରେ ମନର ବୋଇତ
ଭସାଇଲ ହସି ହସି I
ତୁମରି ଆଖିର ଚମକରେ ସଖୀ
ଉଜ୍ୱଳ ହେଲା ମୋ ମନ
ସପନେ ସାଜିଲ ସପନ ସୁନ୍ଦରୀ
ସୁଶୀତଳ ନୀଳଜହ୍ନ I
ତୁମ ଗାଁ ନଈ ଗୀତ ଗାଇ ଗାଇ
ମନ ମୋ ଚୋରାଇ ନେଲା
ସେହିନଈ ତା'ର ମୃଦୁ ସ୍ପର୍ଶଦେଇ
ଉଚ୍ଚାଟିତ ମୋତେ କଲା I
ତୁମରି ପ୍ରେମର ମହକରେ ଯେବେ
ମହକିଲା ଚଉଦିଗ
ମାଛରଙ୍କା ପକ୍ଷୀ ମାଛ ଝାମ୍ପିନେଲା
ଚାହିଁ ଦେଖୁଥିଲା ବଗ I
ଅନ୍ଧାର ଜାଳିଲା ସପନ ସଳିତା
ଆଖି ହଜାଇଲା ନିଦ
ମରଣ ଶେଯରେ ଦିଶି ଯାଉଥିଲା
ଜୀବନର ପୂର୍ଣ୍ଣଛେଦ I