ମାଆ
ମାଆ
ଦଶହରା ଭଳି ପୂଜା ପରବରେ
ଆଗ ପରି ଆଉ ନଥିଲା ଭିଡ଼
ମନରେ ନଥିଲା ସେ ସୁଖ ସରାଗ
ଅବା ଘରଟାରେ ଖୁସିର ଝଡ଼ ll
କାକରା ପିଠାର ଚେଁଏ ଶବଦ ବା
ଘିଅ କଡେଇରେ ନଥିଲା ଧୂଆଁ
ପୁରୁଣା ଲୁଗାରେ ଅଟକି ରହିଲା
ଦେଖିଲାନି ଆଖି ମୂଳରୁ ନୁଆଁ ll
ତୋର ପୂଜା ଲାଗି ଫଳ ଫୁଲ ମାଆ
ଆଣିପାରିଲିନି କିଣି ହାଟରୁ
ଅଭିମାନ ଆଉ କରିବୁନି କହ
ଫେରିଗଲି ବୋଲି ଅଧା ବାଟରୁ ll
ତୋ' ପରି ମାଆଟେ ଘର କଣେ ବସି
ଖୁଁ ଖୁଁ ହୋଇ କାଶୁଛି କେତେ
ହେତୁ କରି ପୁଅ ଆଣିବୁ ଓଷଦ
କହିଥିଲା ପରା କାନରେ ମୋତେ ll
ବାପା ଗଲାପରେ ଝୁରି ଝୁରି ତାଙ୍କୁ
ଦେହଟା ତାହାର ହେଲାଣି କ୍ଷୀଣ
ମୋର ମୁହେଁ ଟିକେ ହସ ଦେଖିବାକୁ
ଈଶ୍ୱରଙ୍କୁ ମଧ୍ୟ ଦେଉଛି ରାଣ ll
ଜରୁରୀ ବୋଲି ମୁଁ ଭାବିଲି ମାଆଲୋ
ତୋ'ର ପୂଜା ଠାରୁ ତା'ର ଓଷଦ
ସେ ପାଇଁ ଫେରିଲି ଔଷଧ ଧରି ମୁଁ
ମନରେ ନରଖି କିଛି ବିଷାଦ ll
ସୁସ୍ଥ ହେବା ପରେ ସୋଇପଡ଼ିଥିଲି
ତା'ରି କୋଳରେ ମୁଣ୍ଡ ମୋ' ରଖି
ନିଦ ଯେବେ ମୋର ଭାଙ୍ଗିଗଲା ମାଆ
ଚମକି ଗଲି ମୁଁ ତୋ' କୋଳ ଦେଖି ll
ସତରେ ମାଆଲୋ ତୋର ସୁଦୟାରୁ
ଦୂର ହେଉ ଯେତେ ସଂସାର ଦୁଃଖ
ସାହା ଭରସା ମୋ କେହି ନାହିଁ ଏଠି
ସଦା ଦେଖୁଥିବି ମାଆର ମୁଖ ll