ଅଢେଇ ଦିନର ପ୍ରେମ
ଅଢେଇ ଦିନର ପ୍ରେମ
ସାଙ୍ଗ ପାଇଁ ସାଙ୍ଗ ଜୀବନ ଦିଅନ୍ତି
ଶୁଣିଥିଲି ଏଇ କାନରେ
ସ୍ବାର୍ଥ ପାଇଁ ସାଙ୍ଗ ଜୀବନ ନିଅନ୍ତି
ଏ କଥା ବି ଅଛି ଧ୍ଯାନରେ ।
ଯେଉଁ ମାଆ ତୋତେ ନମାସ ନଦିନ
ଗର୍ଭରେ ସାଇତି ଧରିଲା
ନିଜେ ନଖାଇକି ତୋ'ର ସେ ପେଟକୁ
ଆନନ୍ଦ ମନରେ ଭରିଲା ।
ବାପା ସହିଗଲା ଶୀତ ରାତି ସବୁ
ପିଠି ଦେଖାଇଲା ଖରାକୁ
ତୋତେ ପାଇ ଗର୍ବେ ଫାଟି ପଡୁଥିଲେ
ସରା ମଣୁଥିଲେ ଧରାକୁ ।
ଏ ସବୁ ନଥିଲା କର୍ତ୍ତବ୍ୟ ତାଙ୍କର
ପ୍ରେମ ହିଁ ତ ଥିଲା ମନରେ
କରିଗଲେ ସବୁ ଯେତକ ଯତନ
ଲୋଭ ନରଖିକି ଧନରେ ।
ତିରିଶ ବର୍ଷର ପ୍ରେମ ଆଜି ତୋତେ
ଅଲୋଡା କାହିଁକି ଲାଗିଲା
ଅଢେଇ ଦିନର ପ୍ରେମଟା କି ପ୍ରେମ
ହୃଦୟଟା ପୁଣି ଭାଙ୍ଗିଲା ।
ଜାଣି ପାରିଲୁନି କେନ୍ଦେରେ ମେନ୍ଦେରେ
ପ୍ରେମ ପତିଆରା ନାଟକୁ
କାପୁରୁଷ ପରି ବାଛି ନେଇଗଲୁ
ଆତ୍ମହତ୍ୟା ପରି ବାଟକୁ ।
ମିଛ ମାୟା ଏହି ଦୁନିଆ ଭିତରେ
କ୍ଷଣସ୍ଥାୟୀ ସବୁ ସତରେ
ମାତା ପିତାଙ୍କର ପ୍ରେମ ହିଁ ନିଃସ୍ବାର୍ଥ
ଲେଖୁଛି ଆଜି ମୋ' ମତରେ ।