ମାଆ ଆସୁଛନ୍ତି

ପାଟରେ ପଠାରେ  ଶୁଭ୍ର କାଶତଣ୍ଡି

           ଝୁଲି ଝୁଲି ଝୁଲି ନାଚୁଛି

ଅଶିଣ ଆକାଶୁ    ରୁପେଲି ଜହ୍ନଟା

           ଶୀତଳ ଜୋଛନା ଯାଚୁଛି

           କିଏ ସତେ ଅବା ଆସୁଛି

ଆଗମନେ ତା'ର   ପୁରପଲ୍ଲୀ ଆଜି

           ଶେଫାଳି ଶେଫାଳି ବାସୁଛି

ବରଷା ବିଜୁଳି   ଘଡଘଡି ପରା

           ଚାଲିଗଲେ ନେଇ ମେଲାଣି

ଶୋଭାମୟୀ ଆମ  ଧରଣୀ ରାଣୀର

           ଶୋଭା ଦୁଇଗୁଣ ହେଲାଣି

           ଏଇ ସୁମଧୁର ବେଳରେ

ମାଆ ଆସୁଛନ୍ତି  କିଛି ଦିନ ପାଇଁ

           ରହିବେ ଆମରି ମେଳରେ 

ମାଆଙ୍କର ପୂଜା   ଆରାଧନା ଲାଗି

           ସବୁରି ପରାଣ ଜାଗିଛି

ପୂଜା ମଣ୍ଡପରେ  ସାଜ ତୋରଣରେ

           ନାନା ଜାତି କାମ ଲାଗିଛି

           ଖୁସି ଦିଶେ ସବୁ ମୁହଁରେ

ବରଷକ ପରେ   ଆସୁଛନ୍ତି ମାଆ

            ଛୋଟ କଥା ଇଏ ନୁହଁରେ 

ମାଆ ଆସିବାକୁ   ମରତ ବାସୀଏ

             ରହିଥିଲେ ସବୁ ଅନାଇ

କିଣାକିଣି ହୁଏ    ନୂଆ ଲୁଗାପଟା

             ପିନ୍ଧିବେ ମନକୁ ମନାଇ

             ଦଶରା' ପରବ ପାଳିବେ

ଶୁଭ ମନାସିବେ   ମାଆଙ୍କ ଆଗରେ

             ଘିଅ ଦୀପ ନେଇ ଜାଳିବେ 

କାତରେ ଡାକୁଛୁ   ଶୁଭଦା ସୁଖଦା

              ମାଆ ଦଶଭୁଜା ଆସହେ

ସୁନା କରିଦିଅ     ଆମ ଦୁନିଆକୁ

              ହିଂସା ଅହମିକା ନାଶହେ

              ମା' ଦୁର୍ଗେ ଦୁର୍ଗତିନାଶିନୀ

ଝରାଇ ଦିଅହେ    କରୁଣାର ଧାରା

              କଇଳାଶ ଗିରି ବାସିନୀ