କୁନି ବାନ୍ଧିବ ରାଖି

ଦାଣ୍ଡରେ କୁନି ଚାହିଁ ବସିଛି

ବଜାରୁ ରାଖୀ କିଣି

ବାନ୍ଧିବ ବୋଲି ସ୍ନେହର ରାଖୀ

ଭାଇର ମନ ଜିଣି l

କଜଳ ସାଥେ ଚନ୍ଦନ ଟିପା

ଲଗାଇ ଦେବ ସିଏ

ରାଖୀ ବାନ୍ଧି କି' ଆଶିଷ ନେବ

ଖୁଆଇ ମିଠାଟିଏ l

ଶୁଭ ଦିନଟି ଆସିଲା ବେଗେ

ଖୁସିର ବାର୍ତ୍ତା ନେଇ

ପୁନେଇଁ ଦିନ ମାମୁଁ ଗାଆଁରୁ

ଆସିଲା କୁନା ଭାଇ l

ଖୁସିରେ କୁନି ନାଚି ଉଠିଲା

କୁନା ଭାଇକୁ ଦେଖି

ଡେରି ନ କରି ବାନ୍ଧି ଦେଲା ସେ'

ସେନେହ ଭରା ରାଖୀ l

ଭାଇ ପାଖରୁ ପାଉଣା ପାଇ

ହୋଇଲା କୁନି ଖୁସି

ତା' ପରେ ଦୁହେଁ ଖାଇଲେ ପିଠା

ବାପାଙ୍କ କୋଳେ ବସି l

ସତରେ ଏଇ ରାଖୀ ପୁନେଇଁ

ଯୋଡ଼େ ମିଠା ସମ୍ପର୍କ

ଭାବର ଡାଳେ ସେନେହ ବୋଳି

ଛୁଟାଇ ଥାଏ ମହକ l