Library
କୁଆଁର ପୁନେଇଁ ଜହ୍ନ ଗୋ
କୁଆଁର ପୁନେଇଁ ଜହ୍ନ ଗୋ
କୁଆଁର ପୁନେଇଁ ଜହ୍ନ ଗୋ
ଫୁଲ ବଉଳବେଣୀ
କୁଆଁରୀ ମନରେ ଅନେକ ସପନ
ପୁଚି ଖେଳିବାକୁ ମନଲୋ
ଫୁଲ ବଉଳବେଣୀ
ସବୁଜିମା ଦିଶେ ମହୀ ଲୋ
ଫୁଲ ବଉଳବେଣୀ ।
କାଶତଣ୍ଡୀ ଫୁଲ ଶୁଭ୍ର ବେଶେ ଦେଖ
ମଳିନ ପଡେ ଚାନ୍ଦିନୀ ଲୋ
ଫୁଲ ବଉଳବେଣୀ ।
କୁଆଁର ପୁନେଇଁ ଜହ୍ନ ଲୋ
ଫୁଲ ବଉଳବେଣୀ ।
ଗାଁ ଝିଅ ସବୁ ଏକାଠି ହୁଅନ୍ତି
ସ୍ନାହାନ କରିବେ ସରୋବରେ ଲୋ
ଫୁଲ ବଉଳବେଣୀ ।
ସିନ୍ଦୁରା ଫାଟିଲେ ପୂରୁବ ଆକାଶେ
ପିନ୍ଧି ନବ ବସ୍ତ୍ର ଧରିବେ ସ୍ନେହ ଆଞ୍ଜୁଳି ଲୋ
ଫୁଲ ବଉଳବେଣୀ ।
ଅଗଣାରେ ଦେବେ ଥୋଇ ଲୋ
କଳସ,ଫୁଲ,ଦୀପାଳି
ଖଇ,ଗୁଆ ଟେକି ଦେବେ ହୁଳହୁଳି
ସୂର୍ଯ୍ୟଙ୍କୁ କରିବେ ବରଣି ଲୋ
ଫୁଲ ବଉଳବେଣୀ ।
ସାହି ସାହି ଝିଅ ବୁଲିବେ ହସ ମଜା କରିବେ
ଗୀତ ଗାଇ ପୁଣି ପାଳ ଭୂତ ଖେଳି
ବୋହୁଚୋରି ଖେଳି ନାନା ଖେଳେ ଯିବେ ମାତିଲୋ
ଫୁଲ ବଉଳବେଣୀ ।
ଅନ୍ଧାରୀ ରାତିରେ ବୁଲିବେ
ବେଶ ବଦଳାଇ ଘରେ ପଶିବେ
ଦେବେ ଚମକାଇ ଛାତି ଲୋ
ଫୁଲ ବଉଳବେଣୀ ।
ନବ ବସ୍ତ୍ର ପିନ୍ଧି ନବ ଉନ୍ମାଦନେ
ଉଲ୍ଲାସରେ ଯିବେ ମାତିଲୋ
ଫୁଲ ବଉଳବେଣୀ ।
ପାଦରେ ଅଳତା କାନରେ ଝୁମୁକା
ଚୁଡ଼ି ଦିଶୁଥିବ କରେ ଯେ
ଫୁଲ ବଉଳବେଣୀ ।
କୁଆଁରୀ ସପନ ଦେଖିବେ ଜହ୍ନମାମୁଁକୁ ଚାହିଁ
ସନ୍ଧ୍ୟା ଗଲେ ନଇଁ ଚାନ୍ଦ ପୂଜିବାକୁ
ଚଉଁରା ମୂଳରେ ଭେଟିଲୋ
ଫୁଲ ବଉଳବେଣୀ ।
ନଡ଼ିଆ, କଦଳୀ, ଛେନା, ଗୁଡ଼, ଖଇ
ଦେବେ ଚାନ୍ଦ ଚକଟିଲୋ
ଫୁଲ ବଉଳବେଣୀ ।
ବୃନ୍ଦାବତୀ ମୂଳେ କଳସ ବସାଇ
ନବ ବସ୍ତ୍ରେ ଦେବେ ସଜାଇ ଲୋ
ଫୁଲ ବଉଳବେଣୀ ।
ଚାନ୍ଦ ପୂଜା ପୁଣି କରିବେ
ହାତେ ଚାନ୍ଦ କୁ ଗଢି
ଜହିଂ ପତ୍ର, କାକୁଡି ପତ୍ର ଭୋଗକୁ
ଦେବେ ସାତ ପତ୍ରେ ଥୋଇଲୋ
ଫୁଲ ବଉଳବେଣୀ ।
ସାଙ୍ଗ ସାଥି ମେଳେ ବୁଲିବେ
ଘରଘର କୁ ଯାଇ
ଚାନ୍ଦ ପୁଣି ନିଜେ ବସିବେ ପରସ୍ପରେ ଖୁଆଖୋଇ
କୁମାରୀ ମନରେ ଆଶା ଲୋ
ଫୁଲ ବଉଳବେଣୀ ।
ମନଲାଖି ବର ପାଇଁ ଗୋ
ଚାନ୍ଦ ମନାସି ଯିବେ
ଚନ୍ଦ୍ରମା କୁ ପୂଜି ଖୁସି ମନେ ହେଜି
ନୂଆ କଥା ମନେ ଭାବି ଭାବିଲୋ
ଫୁଲ ବଉଳବେଣୀ ।
କୁମାରପୂର୍ଣ୍ଣିମା ଆସଇ କେତେ ଆଶା ସଂଚାରୀ
କୁଆଁରୀ ଝିଅଟା ସଜବାଜ ହେଇ
ଆଶୀର୍ବାଦ ନିଏ ସବୁରି ଲୋ
ଫୁଲ ବଉଳବେଣୀ ।
ପୂଜି ସୂର୍ଯ୍ୟ, ଚନ୍ଦ୍ର ଦେବଙ୍କୁ କେତେ ଆନନ୍ଦ ପାଏ
ଆସନ୍ତା ବର୍ଷକୁ ଅପେକ୍ଷା କରିସେ
ଦିନ ସବୁ ସୁଖେ ବିତାଏ ଲୋ
ଫୁଲ ବଉଳବେଣୀ ।
