ଆକାଶ କଇଁଆ ଚିଲିକା ମାଛ

ମା ' ରାଣ୍ଡି ଅଟେ ପୁଅ ଅନନ୍ତା

ଅଣ୍ଟାରେ ହାତ ତା'ର ବଡବଡିଆ କଥା ।

ସାହି ଗଳିରେ ନିତି ସଂଜେ ବୁଲୁଛି

ଇଲେକ୍ସନ ପାଇଁ କ୍ୟାମ୍ପେନ କରୁଛି ।

ସରପଞ୍ଚ ପାଇଁ ବଳୁଚି ମଥା

ଗଛରୁ କୋଳି ତୋଳିଲା ପରି କହୁଛି କଥା ।

ଏଥର ଭୋଟ ଆସିଗଲାଣି

ଟିକଟ ଟିକେ ତ ପାଇଗଲାଣି ।

ସାହି ମାଇପଙ୍କୁ କରିଛି ଭେଟ

ଭାତ ଡାଲମାଟେ କରିବ ଘାଣ୍ଟ ।

ଦେଉଅଛି ସେଠି ବଡ଼ ଭାଷଣ

ଘୁଞ୍ଚାଇବି ତୁମ ସବୁ କଷଣ ।

ସାହିକୁ କରିବି କଂକ୍ରିଟ ରାସ୍ତା

ସବୁ ଘରେ ରଖିବି ବଢିଆ ଆକ୍ୱାଗାର୍ଡ ପାଣି ବ୍ୟବସ୍ଥା ।

ଗ୍ୟାସ ଆସିବ ମାଗଣାରେ ଭରି

ଖୁସି ଭରିଦେବି ମନେ ସବୁରି ।

ଗାଁ ମାଇପେ ପୁଣି ସଭା କରନ୍ତି

ଅନନ୍ତା କଥାରେ ତାଳି ମାରନ୍ତି ।

ଗଳି ଗଳି ବୁଲି ହାତ ଯୋଡନ୍ତି

ଓଠ ଆଉଁସି ପିଠି ଥାପୁଡି ଦିଅନ୍ତି ।

ଏଥର ସରପଞ୍ଚ ନିଶ୍ଚେ ହୋଇଲେ

ଅନନ୍ତା ଦୁଃଖ ଦୂର କରିବ ଭଲେ ।

ଗାଁ ଈସୁକୁଲ ବହୁତ ଦୂର

ଛୋଟ ପିଲା ଯିବାକୁ ହୁଅନ୍ତି ହରବର ।

କନଭେଟ ଈସୁକୁଲ ପାଖେ ଖୋଲିବି

ବିଦେଶୁ ମାଷ୍ଟର ପୋଷ୍ଟିଙ୍ଗ ଦେବି ।

ପିଲାଏ କହିବେ ଠସ ଠାସ ଇଂରାଜୀ ଭାଷା

ବାପା ମା' ଦେଖି ଉଡ଼ିବ ହଂସା ।

ରାତି ଦିନ ସବୁ ଏକ କରି

ଅନନ୍ତା ଯାଉଛି କର୍ମେ ବାହାରି

ସତେକି ସବୁ ଓଲଟାଇବ

ରାତ୍ରି ନିଦ୍ରା ତେଜି ସକାଳ ହୋଇଲେ

ପୁଣି ଟିକେ ଶସ୍ତା ଭାଷଣ ଦେବ ।

କରିଛି ସେ କେତେ ମନକୁ ପାଞ୍ଚ

ଦେଇଅଛି କେତେ କାହାକୁ ଲାଞ୍ଚ ।

ଆସରା କରିଛି କହୁଛି ମିଛ

ଏତ ଆକାଶ କଇଁଆ ଚିଲିକା ମାଛ ।

ଭଗି ନାନୀ ଝିଅ ମିନା ବିବାହ

କହୁଛି କରିବ ଦେଇ ଯୌତୁକ ।

ମିନା ବୋଉ ପୁଣି ଆଶ୍ୱସ୍ତି ପାଇ

ସତେ ସରପଞ୍ଚ ହେଲେ ମୋ ପୁତୁରା

ଦୁଃଖ ସବୁ ଦେବ ଆମ ଘୁଞ୍ଚାଇ ।

ଝିଅ ମୋର ପୁଣି ସୁଖେ ରହିବ

ସତେ ମୋ ଅନନ୍ତା ପରି କିଏ ହୋଇବ ।

ଗାଁ ସରପଞ୍ଚ ଅନନ୍ତା ହୋଇଲେ

ଗାଁ ସୁଖ ଦୁଃଖ ବୁଝିବ ଭଲେ ।

କିଏ ନ ଜାଣିଛି ଅନନ୍ତା ଗୁଣ

ପଛେ କରୁଥାନ୍ତି ଟାହି ଟାପରା ପୁଣ ।

ତଥାପି ତା କଥାରେ ଟିକେ ମୁଣ୍ଡ ପୁରାନ୍ତି

ଆଗରେ ହସି ପଛେ ମୁହଁ ମୋଡନ୍ତି ।

ପଛରେ କହନ୍ତି ମାଆ ଧାନ କୁଟି ପୁଅ ନାଗର

ଭାଷଣ ମାରୁଛି ହୋଇ ଫରଫର ।

ଯା ଯା ତୋ କଥା ଲଥାକୁ କିଏ ଶୁଣୁଛି

ଏତ ଆକାଶ କଇଁଆ ଚିଲିକା ମାଛ ଲାଗୁଛି ।