ଏତିକି ମାଗୁଣି ମୋର
ଏତିକି ମାଗୁଣି ମୋର
ହାତ ଟେକି ଦେଇ ମାଗୁଣି କରୁଛି
ପ୍ରଣମୁଛି ତୋ ପୟରେ
ରଖିଲେ ରଖିବୁ ନ ରଖିଲେ ନାହିଁ
ଛାଡିଦେଲି ତୋ ଉପରେ I
ସବୁ ତ୍ୟାଗକରି ଶରଣ ନେଉଛି
ମାଗୁଛି କରୁଣା ତୋର
ତୋ ଭିନ୍ନ ଯେପରି ଆଉ କାହା ଆଗେ
ନଇଁବନି ମୋର ଶିର I
ଅବଢା ଅନ୍ନରେ ପୁରାଇବୁ ପେଟ
ଟଙ୍କ ତୋରାଣିରେ ଶୋଷ
ତୋ ଚକା ନୟନ ଦର୍ଶନରେ ମୋର
ପୂର୍ଣ୍ଣ ହେବ ଅଭିଳାଷ I
ତୋ ବଡ ଦାଣ୍ଡରେ ଦେଖୁଥିବି ସଦା
ପତିତ ପାବନ ନେତ
ତୋ ଶ୍ରୀକ୍ଷେତ୍ର ମାଟି ମସ୍ତକରେ ବୋଳି
ମନ କରୁଥିବି ତୃପ୍ତ I
ମହୋଦଧି ସ୍ନାନ କରୁଥିବି ସଦା
ତୋ ନାମକୁ ମନେ ସ୍ମରି
ତୋ ଗୁଣ କୀର୍ତ୍ତନ ଶୁଣୁଥିବ କର୍ଣ୍ଣ
ଗାଉଥିବି ହରି ହରି I
ଏତିକି ସୁଦୟା କରିବୁ ମୋ ପ୍ରତି
ରଖିବୁ ମୋତେ ତୋ କ୍ଷେତ୍ରେ
ଜୀବନ ସାର୍ଥକ ହେବ ମୋର ତୋତେ
ଦେଖୁଥିଲେ ଚର୍ମନେତ୍ରେ I