କଷ୍ଟ କଲେ କୃଷ୍ଣ ମିଳେ
କଷ୍ଟ କଲେ କୃଷ୍ଣ ମିଳେ
ଝରା ଶେଫାଳୀର ବାସ୍ନା ପାଇବାକୁ
ଅନିଦ୍ରା ରହିବ ରାତି
ଦୂର କରି ହୁଏ ଅମା ଅନ୍ଧକାର
ଜଳୁଥିଲେ ଏକ ବତୀ ।।
ନିତିଦିନ ଶ୍ରମ କରୁଥିଲେ ସିନା
ଫଳ ମିଳିବ ଉତ୍ତମ
ସୁଖ୍ୟାତି ଲଭିବ ସମାଜରେ ପୁଣି
କରୁଥିଲେ ଭଲ କାମ ।।
ମନ ଦେଇ ପାଠ ପଢ଼ିଲେ ମିଳିବ
ପରୀକ୍ଷାରେ ଭଲ ଫଳ
ଗଛଟିର ଯତ୍ନ ନେଲେ ସିନା ହେବ
ହୃଷ୍ଟପୃଷ୍ଟ ପତ୍ର ଡାଳ ।।
ନିଜ ଘରଦ୍ୱାର ରାସ୍ତାଘାଟ ସବୁ
ସଫା ରଖୁଥିବ ସଦା
ସ୍ୱଚ୍ଛ ଭାରତର ନିରିମାଣ ହେବ
ତିଳେ ନାହିଁ ଏଠି ଦ୍ଵିଧା ।।
ମୂଳଦୁଆ ଶକ୍ତ ଥିଲେ ସିନା ହେବ
ସୁଦୃଢ଼ଟି ପକ୍କାଘର
ମିଳିବଟି ସଦା ଅନ୍ନ-ବସ୍ତ୍ର-ବାସ
ପରିଶ୍ରମ ଯଦି କର ।।
ଦୁର୍ନୀତି କୁକର୍ମ ତ୍ୟାଗ କଲେ ସିନା
ସୁମଣିଷ ବୋଲାଇବ
ସ୍ବାସ୍ଥ୍ୟର ଯତନ ନେଲେ ସିନା ସଦା
ସୁସ୍ଥ ନିରୋଗ ରହିବ ।।
ଯେଉଁ କାମ କର ସୁଫଳ ମିଳିବ
ପରିଶ୍ରମୀଟିଏ ହେଲେ
ମନେ ରଖିଥାଅ ଭାଇଭଉଣୀ ମୋ
କଷ୍ଟ କଲେ କୃଷ୍ଣ ମିଳେ ।।