କେମିତି ହସିବି ମୁହିଁ

ମୋ ଜୀବନ ସ୍ବପ୍ନ ଭାଙ୍ଗି ହେଲା ଚୂର୍ଣ୍ଣ

ସବୁ ସମୟ ଚକରେ

ଯହା ଇଚ୍ଛା ଥିଲା ପୂରଣ ନ ହେଲା

ରହି ନ ପାରେ ଖୁସିରେ

ଦିନ ଗଲା ଚାହିଁ ଚାହିଁ

ଅଶାନ୍ତ ମନରେ ବିକଳ ହୃଦୟେ

କେମିତି ହସିବି ମୁହିଁ ?

ସଂସାରୀ ଜୀବନ ଧନ ଯଶ ମାନ

ସୁଖ ଭରି ପାରେନାହିଁ

ଆସେ ସରି ସରି ଆୟୁଷ ମୋହରି

ମୁଁ ମୋର କହି କହି

ଏ ପରା ଦୁଃଖର ନଈ

ମନ ଅଗଣାରେ ପ୍ଳାବନ ଛୁଟାଏ 

କେମିତି ହସିବି ମୁହିଁ ?

ମାୟା ମରୀଚିକା ଜୀବନ ଦୀପିକା

ବିଭୁ ନାମ ନ ଭଜଇ

ନାନା ରୋଗ ଦୁଃଖ ହରି ନିଏ ସୁଖ

କରମ ପାଉଣା ଦେଇ

ଭୁଲ୍ ପଥ ଆପଣେଇ

ସମୟ ସାଥିରେ ସାଲିସ୍ କରି କରି

କେମିତି ହସିବି ମୁହିଁ ?