କରୋନା ସଂଘର୍ଷ

ଡିସେମ୍ବର ମାସ ଊଣେଇଶୀ ଶହ

ଊଣେଇଶ ମସିହାରେ,

ମହାମାରୀ ରୋଗ ଜନମ ହୋଇଲା 

ଜନ୍ମଭୂମି ଚାଇନାରେ |୧|

କୋଭିଡ଼ ଅଣିଶ ନାମରେ ଏ ରୋଗ

ସାରା ପୃଥିବୀ ବିଖ୍ଯାତ,

ନାହିଁ ଇଞ୍ଜେକ୍ସନ ନାହିଁ ତ ଚିକିତ୍ସା

ଭାଇରସ କରେ ଭିତ |୨|

ଦିନୁ ଦିନ ବଢ଼େ କରୋନା ରୋଗ ଯେ 

ବିଶ୍ବ ସାରା ଗଲା ମାଡ଼ି,

ଶବ ପଡ଼ିଗଲା ଲକ୍ଷ ଲକ୍ଷ ସଂଖ୍ୟା

ପୋକ ପରି ଗଲେ ଗଡ଼ି |୩|

ଭାରତ ମାଟିରେ ଆସି ପାଦ ଦେଲା

କରୋନା ଯେ ମହାମାରୀ,

ପଡ଼ିଲା ଆତଙ୍କ ଭାଙ୍ଗିଗଲା ଡଙ୍କ

ଅର୍ଥନୀତି ଗଲା ସରି |୪|

ପବନ ବେଗରେ ରୋଗ ବ୍ଯାପିଗଲା

ଆତଙ୍କେ ପଡ଼ିଲା ହୁରି,

ରଖ ମହାବାହୁ କେ ରଖିବ ଆଉ 

ତୁମ୍ଭେ ଥାଉ ଗଲୁ ସରି |୫|

କଳ କାରଖାନା ଅଫିସ ସବୁ ଯେ

ବିଦ୍ୟାଳୟ ବନ୍ଦ ହେଲା,

ଜୀବନ ବିକଳେ ସମସ୍ତେ ଧାଇଁଲେ

ଘରେ ପଡ଼ିଗଲା ତାଲା |୬|

ଶହ ଶହ କିମି ପାଦରେ ଚାଲିଲେ 

ନ ପାଇଲେ କିଛି ଗାଡ଼ି,

ସାଇକେଲ ହେଲା ଅସଲ ସାଥି ଯେ

ବାଟେ ଗଲା ଜୀବ ଛାଡ଼ି |୭|

କଂଙ୍କ୍ରିଟ ଟାଙ୍କିରେ କିଏ ବି ଆସିଲା

କିଏ ଆସେ ପାଦେ ଚାଲି,

କଅଁଳା ଶିଶୁକୁ ଛାତିରେ ପକାଇ

କିଏ ଚାଲେ ଗାଆଁ ପଲ୍ଲୀ |୮|

ଚାଲିବା କରୁଣ କାହାଣୀ ବର୍ଣ୍ଣିବା

ନୁହଁଇ ସମ୍ଭବ ଭାଷା,

ଅନୁଭବୀ ଜାଣେ ଦୁଃଖର ବୋଝଟା

ବୁଡ଼ି ଯାଉଥାଏ ଆଶା |୯|

ପେଟ ବିକଳରେ ଆଗକୁ ଚାଲିଲେ

ଲକ୍ଷ୍ୟର ପୂରଣ ପାଇଁ ,

ସରକାର କଲେ ତାଙ୍କ ଥଇଥାନ

କ୍ବାରେନଟାଇନେ ନେଇ |୧୦|