କରାଅ ଧର୍ମର ଜୟ
କରାଅ ଧର୍ମର ଜୟ
ମୋ ସେବା ପୂଜାରେ ସନ୍ତୋଷ ହୁଅ ହେ
ଆଶୁତୋଷ-ଜ୍ୟୋତିର୍ମୟ,
ଭାରତ ଯୁଦ୍ଧରେ ପାଞ୍ଚପୁତ୍ର ଯିବେ
କରାଅ ଧର୍ମର ଜୟ ।
ତୁମେ ଦେବ ଦେବ ମହାଦେବ ନାଥ
ତୁମ୍ଭଙ୍କୁ କି ଅଗୋଚର,
କେତେ ଅପମାନ ,ଅନ୍ୟାୟ ,ସହିଛୁ
ଦେଖିଛ ତ ଶୂଳଧର ।
ସିମନ୍ତରୁ ମୋର ସିନ୍ଦୁର ଲିଭିଲା
ଗଲା ରାଜରାଣୀ ସୁଖ,
ବାଳୁତ କାଳରୁ ସନ୍ତାନେ ଭୋଗିଲେ
ମୋର ଅସରନ୍ତି ଦୁଃଖ ।
ଭାଇ ଯିଏ ଆମ ଭଗାରୀ ସାଜିଲେ
କା'ରେ କହିଥା'ନ୍ତି କୁହ,
ବିନାଦୋଷେ ବିଷ ଲଡ଼ୁ ଖୁଆଇଲେ
ଜତୁ ଗୃହେ କଲେ ଦାହ ।
କୁଳବଧୂକୁ ମୋ ରାଜସଭା ମଧ୍ୟେ
ବାସ ହରୁଥିଲେ ଆଣି,
କୋଟି ବସ୍ତ୍ର ଦେଇ ଲଜ୍ଜା ନିବାରିଲେ
ଡାକ ଶୁଣି ବେଣୁପାଣି ।
ଛଳ କରି ରାଜ୍ୟ କାଢ଼ିନେଲେ ଯେଣୁ
ପୁତ୍ରେ ଗଲେ ବନବାସେ,
ଅଜ୍ଞାତବାସକୁ ସାରି ଇଚ୍ଛା କଲେ
ଫେରିବାକୁ ନିଜ ଦେଶେ ।
ବିନା ଯୁଦ୍ଧରେ ସେ ସୂଚ୍ୟଗ୍ରେ ମେଦିନୀ
ଦେବେନାହିଁ କଲେ ଘୋଷ,
ଧର୍ମଯୁଦ୍ଧ ଲାଗି ଏବେ ପୁତ୍ରେ ତେଣୁ
ଚଳିବେ ହେ ଯୋଗୀଈଶ ।
ମାଧବ ଆମର ଚିରକାଳ ସଖା
ହେବେ ଅର୍ଜ୍ଜୁନର ରଥୀ,
ତୁମେ ଗଙ୍ଗାଧର ଆଶିଷ ବାଞ୍ଛିଲେ
ଧର୍ମ ଯୁଦ୍ଧେ ଯିବେ ଜିତି ।