କଳ୍ପବଟ

କଳପ ବଟରେ କଳପ ବଟ l

ତୋ ପାଇଁ ଲେଖୁଛି ଅଳପ ଗୀତ ll

କେଉଁ କାଳୁ କ୍ଷେତ୍ରେ ରହିଛୁ ତୁହି l

କୋଟି କୋଟି ଯୁଗ ଗଲାଣି ବହି ll

ସୃଷ୍ଟି ଭାସି ଗଲା ପ୍ରଳୟ ଜଳେ l

ଅକ୍ଷୟ ବଟ ତୁ ରହିଲୁ ହେଳେ ll

ବଟ ପୂଟ ଶାୟୀ ଆରତ ତ୍ରାଣ l

ତୋର ପତ୍ରେ କରିଥିଲେ ଶୟନ ll

ରୂପ ଧରିଥିଲେ ବାଳ ମୁକୁନ୍ଦ l

ନମସ୍ତେ ନମସ୍ତେ ଶ୍ରୀ ଆଦିକନ୍ଦ ll

ଭାସି ଯାଉଥିଲେ ମାର୍କଣ୍ଡ ଋଷି l

ବାହୁବଳେ ଧରିଥିଲେ ଆକର୍ଷି ll

ଡାଳେ ବସିଥିଲା ଭୂଷଣ୍ଡ କାକ l

କଳପଜୀବି ସେ କଳପ ଯାକ ll

ରାମ ନାମ ଜପୁ ଜପୁ ସେ ତୁଣ୍ଡେ l

ଖସିପଡ଼ି ଥିଲା ରୋହିଣୀ କୁଣ୍ଡେ ll

ଚତୁର୍ଭୁଜ ନାରାୟଣ ମୁରତି l

ଧରି କଲା ସ୍ୱର୍ଗ ରାଇଜେ ଗତି ll

ମୂଳେ ତୋର ବସି ଶ୍ରୀ ଗଜାନନ l

ଲେଖନୀରେ ସବୁ କଲେ ଲିଖନ ll

କଳପ ବଟରେ କଳ୍ପନା କରି l

ଭାବେ ବାନ୍ଧିଦେଲେ ଭାବର ଡୋରି ll

ଅବଶ୍ୟ ପୁରଇ ମନ କାମନା l

ବିଶ୍ୱାସରେ ହରି ମିଳନ୍ତି ସିନା ll

ଜଗନ୍ନାଥ ଦାସ ବସି ତୋ ତଳେ l

ଭାଗବତ ଶାସ୍ତ୍ର ବଖାଣି ଗଲେ ll

ବାଞ୍ଛା କଳ୍ପତରୁରେ ବଟ ତୁହି l

ପ୍ରଣାମ ଜଣାଇ ରହିଲି ମୁହିଁ ll