କଳ୍ପବଟ

ସତ୍ୟ ଚିରନ୍ତନ ବୈଦିକ ଚିନ୍ତନେ

ଏ ସଂସାର କଳ୍ପବଟ

ସମ୍ଭବେ ଜୀବନ ରକ୍ଷା ସମନ୍ୱୟେ

ନିଃସର୍ଗେ ରସ ଅମୃତ ।

ସୁକୋମଳ ଶିଶୁ ସଂସାର ବୃକ୍ଷର

ମୁକୁଳ ଉନ୍ମେଷ କଳି

ନବ ପଲ୍ଲବିତ ସବୁଜ ହରିତ

କୈଶୋର ଝୁଲେ ଦେହଳି ।

ଆହରେ ଯୌବନ ରଙ୍ଗ ରୂପ ରସ

ବିଶୁଦ୍ଧ ପୋଷକ ତତ୍ତ୍ୱ 

ଅନୁକୂଳ ଶିକ୍ଷା ବୌଦ୍ଧିକ ବିକାଶେ

ହୁଏ ପୃକ୍ତ ପରିପୁଷ୍ଟ ।

ଘର ପରିବାର ସମ୍ବନ୍ଧ ସମ୍ପର୍କ 

ଅଟଇ ଶାଖା ପ୍ରଶାଖା

ଧରି ତୋଳିରଖେ ଜୀବନ ସଳଖେ

ଚଳେ ଅନୁବଂଶ ପ୍ରଥା ।

ପ୍ରବୃଦ୍ଧ ବୟସ୍କ ସ୍ଥିର ଅବିଚଳ

ମୂଳଗଣ୍ଡି ମୂଳଭିତ୍ତି

ରହିଲେ ସୁଦୃଢ ସଞ୍ଜିବୀତ ବୃକ୍ଷ

ହୁଏ ଆଲୋକାନୁବର୍ତ୍ତୀ ।

ସବୁଜ ସୁନ୍ଦର ହେଉ ଏ ସମାଜ

ଫଳଛାୟା ସମନ୍ଵିତ 

ଜୀବନ ବିକାଶେ ବୃକ୍ଷ କଳ୍ପବଟ

ସୃଜୁ ଉଜ୍ଜ୍ୱଳ ଦୃଷ୍ଟାନ୍ତ ।