କଳଙ୍କିନୀ
କଳଙ୍କିନୀ
ଝିଅ ମୁହଁ ଟେକି ପୁଅକୁ ଚାହିଁଲେ
ବୋଲନ୍ତି ଅସତୀ ସିଏ
କିନ୍ତୁ ପୁଅ ଯଦି ଧର୍ଷଣ କରଇ
ସମାଜ ଦୋଷ ନଦିଏ |
ପୁଅମାନେ ସିନା ପିତଳ ମାଠିଆ
ଝିଅତ ମାଟି ମାଠିଆ
ପୁରୁଷ ପ୍ରଧାନ ସମାଜରେ ଆହା
ଏ ବଡ଼ ପକ୍ଷପାତିଆ |
ଗରିବ ପଦନ ଝିଅ ନାଆଁ ଜହ୍ନ
ଗୋଟିଏ ଚାଉଳେ ଗଢ଼ା
ଅପୂର୍ବ ସୁନ୍ଦରୀ ଚାରୁ ବିମ୍ବାଧରୀ
ଅଧିକ ନଥିଲା ପଢ଼ା |
ପାଖ ଗାଆଁ ଏକ ଜମିଦାର ଘରେ
ମାତ୍ର ଅଠର ବର୍ଷରେ
ବିଭା ହୋଇଗଲା ଭାଗ୍ୟକୁ ତାହାର
ବର ରହେ ବିଦେଶରେ |
ନପୁଂସକ ସେତ ନାରୀସଙ୍ଗ ସୁଖ
ଜୀବନେ ସମ୍ଭବ ନାହିଁ
ଫାଟିଲା କପାଳ ଝିଅଟି ବିକଳ
ଉତ୍ତାଳ ଯୌବନ ନଈ |
ପର ପୁରୁଷର ଚୋରା ପୀରତିର
ସୁଯୋଗ ଯୋଗକୁ ମିଳେ
ଏକାଧିକ ଯୁବା ପୁରୁଷଙ୍କ ସଙ୍ଗେ
ସମ୍ପର୍କ ରଖିଲା ବଳେ |
ଲୋକ ଅପବାଦ ଲଜ୍ଜା ମହତକୁ
ପଛରେ ପକାଇ ଦେଇ
କଳଙ୍କିନୀ ଟୀକା ମଥାରେ ପିନ୍ଧିଲା
ଲୋକେ ହେଲେ କୁହାକୁହି |
ଶାଶୁଘର ଲୋକେ କରିଲେ ଅନ୍ତର
ସ୍ଵାମୀ ତ ପଚାରେ ନାହିଁ
ଦେହ ବ୍ୟବସାୟ କରିଲା ସେ ହାୟ
କଟକ ସହରେ ଯାଇ |
ସରଳ ଗାଉଁଲି ଝିଅ ସୁନା ଜହ୍ନ
ନେଲା ନରକ ଆଦରି
ପରିସ୍ଥିତି ତାଡ଼ନାରେ ବାଧ୍ୟ ହୋଇ
କଳଙ୍କିନୀ ଆଖ୍ୟା ଧରି ।