କୀଟ ଦଂଶନ ପର ଧାରା ବିବରଣୀ

କେମିତି ଥାଏ ପରିସ୍ଥିତି 

ପରଭୋଜୀ କୀଟଟିଏ ରକ୍ତ ଶୋଷିବା ବେଳେ

କୁହତ ?

ଯନ୍ତ୍ରଣା ଜର୍ଜରିତ ତୁମେ 

ଓଃ କରି ବ୍ୟକ୍ତ କର ପ୍ରତିକ୍ରିୟା

ଫନ୍ଦା ଛନ୍ଦି ବସ ସେ ଶୁଭ ଲଗ୍ନକୁ

ଯେବେ ଦାନା ଖୁଣ୍ଟିବାକୁ ଆସିଥିବା ଜୀବ 

ଖୁଣ୍ଟ ବଂଧା ଜାଲରେ ଜାବୁଡ଼ିବାକୁ ଦେବ ତା' ଅସ୍ଥିର ପାଦ ।

ଅବା ଶାଣ ଦେଉଥାଏ ଆଖି ଗୋଟିଏ ଶକ୍ତ ଚୋଟ 

ସମସ୍ତ ଶକ୍ତି ସାମର୍ଥ୍ୟ ଏକଜୁଟ କରି

ତୁମ ଭିତରେ

ଗଜୁରାଉଥାଏ ଟୋପେ କୀଟନାଶକ ।

କ'ଣ ଥାଏ ସେ ସମୟେ ମାନସିକ ସ୍ଥିତି,କୁହତ

ଯେତେବେଳେ ମାଂସକୁ ମାଟି ମନେକରି

ସହୁଥାଅ ତୁମେ ଦଂଶନ

ବିନା ପ୍ରତିବାଦରେ

ବନ୍ଦ୍ କରିନିଅ ଆଖି ନାକ କାନ

ନପହଞ୍ଚୁ ପୀଡ଼ିତ ରକ୍ତ-ଗଂଧ-ଚିତ୍କାର ବୋଲି ।

ଅଥବା ଖାଦ୍ୟଚକ୍ର ଆଳରେ ବଞ୍ଚିବାକୁ ଦିଅ 

ଚିରାଚରିତ ଢଙ୍ଗରେ କୀଟ ଜିଉଁ ସ୍ବତନ୍ତ୍ର କହି ,

କ'ଣ ଥାଏ ତୁମ ଚୂଡାନ୍ତ ନିଷ୍ପତ୍ତି ।

ଅବା ଧରିନିଅ

ଅଲଣା ଏ ବୁନ୍ଦାଏ ରକ୍ତ କିଛି ନୁହେଁ ମ

ଆମେ ଶୋଷି ଚାଲିଥିବା 

ଖଟିଖିଆଙ୍କ ବାଲତି ବାଲତି ଲୁଣଯୁକ୍ତ ରକ୍ତ ଆଗରେ

କୁହତ ,କ'ଣ ଥାଏ ପ୍ରତିକ୍ରିୟା କୀଟ ଟିଏ ଦଂଶିଲା ପରେ ।