କିଏ ସେ ?

ଦିନକୁ ଦିନ ତାକୁ ଏଇମିତି ଲାଗେ 

କି ସେ ଏ ପୃଥିବୀର ନୁହେଁ , 

ସେ କାହାର ବୋଲି କାହାର ନୁହେଁ । 

ତା'ର ନିଜର ବୋଲି 

ଏଠି କେହି ନାହାଁନ୍ତି ।

ତା' ଭଳି କଥା ହେଉଥିବା , 

ସୁଖ ଦୁଃଖ ଭୋଗୁଥିବା 

ଲୋକ ଗୁଡ଼ାକ ସତରେ 

କେହି ବି ଏଠି ତା' ଭଳି ନୁହଁନ୍ତି ।

 

ସବୁବେଳେ ପ୍ରଶ୍ନ ଗହଳିରେ 

ଦିନ କାଟିକାଟି 

ତା'ର ମନ ଆଉ ଇନ୍ଦ୍ରିୟ ସବୁ 

ବଧିରା ହୋଇ ଗଲେଣି ।

ତା' ନିଜ ବିଚିତ୍ରତାକୁ ନେଇ 

ସେ ନିଜେ ତ ରହସ୍ୟ ଘେରରେ 

ଆଉ କାହା କଥା କ'ଣ ବୁଝିବ ?

ଦିନେ ସବୁ ଛାଡ଼ିଯିବ 

ଆଉ ମିଶିଯିବ ବୋଲି ସେ ଜାଣେ 

ତଥାପି ଜୀବନ ସାରା ଅବିରତ 

ସଂଗ୍ରାମ କରିଚାଲିଥାଏ 

ନିଜକୁ ବଞ୍ଚାଇ ରଖିବାକୁ , 

କି ଅମର ହେବାକୁ । 

ସର୍ବ ଶେଷରେ 

ପୁଣି ସେହି ପୁରୁଣା ପ୍ରଶ୍ନ 

କିଏ ସେ ?