ବିଶ୍ଵ ତ୍ରିରଙ୍ଗା

ଗଗନ ପବନ ହୁଏ ପ୍ରକମ୍ପିତ

ଘରେ ଘରେ ଆଜି ଉଡ଼େ ତ୍ରିରଙ୍ଗା

ସବୁରି ମନରେ ବହିଯାଉଅଛି

ଆନନ୍ଦ ଉଲ୍ଲାସ ପୁଣ୍ୟର ଗଙ୍ଗା ।

ପଞ୍ଚସ୍ତରି ବର୍ଷ ପୂର୍ତ୍ତି ଅବସରେ

ପାଳୁଛୁ ଅମୃତ ମହୋତ୍ସବକୁ

ବୀର ଯବାନଙ୍କ ଆତ୍ମବଳି ଦାନେ

ଲଭିଅଛୁ ଯେଉଁ ସ୍ବାଧୀନତାକୁ ।

ଯା'ବୀର ରକତେ ଏ ମାଟି ଉର୍ବର

ଭରିଦିଏ ମନେ ନବ ଚେତନା

ଆମ ପରିଚୟ ଆମେ ଭାରତୀୟ

ଗୋଟିଏ ଦେଶ ଗୋଟେ ଭାବନା ।

ପ୍ରତି ଘରେ ଘରେ ଉଡ଼ଇ ତ୍ରିରଙ୍ଗା

ଆନନ୍ଦେ ଜାତୀୟତା ଅନୁରାଗେ

ସ୍ବାଧୀନତାର ଅମୃତ ମହୋତ୍ସବ

ଜାତି ଇତିହାସ ମନରେ ଜାଗେ ।

ପରାଧୀନତାର ଶୃଙ୍ଖଳରେ ବନ୍ଦୀ

ହୋଇଥିଲା ଦିନେ ଭାରତମାତା

ବିଦେଶୀ ଶାସନେ ହୋଇଣ ଅତିଷ୍ଠ

ଦେଶବାସୀ କଲେ ସ୍ୱାଧୀନ ଚିନ୍ତା ।

ଆମରି ଦେଶର ଚିନ୍ତା ନାୟକ

କେତେ ଦେଶ ପ୍ରେମୀ ମନୀଷୀଗଣ

ବୀର ଯବାନଙ୍କ ଅଦମ୍ୟ ପ୍ରଚେଷ୍ଟା

ଶେଷରେ ହୋଇଲା ଦେଶ ସ୍ଵାଧୀନ ।

ଆମରି ଶାସନ ଆମରି ହାତରେ

ଆମେ ଚଳାଉଛୁ ଦେଶ ଆମରି

ସ୍ୱାଧୀନ ଭାରତ ସନ୍ତାନ ଆମେରେ

ଆମରି ନାଆର ଆମେ ନାଉରି ।

ଯାବତ୍ ସୂର୍ଯ୍ୟ ଚନ୍ଦ୍ର ଥିବେ ଜଗତେ

ପାରିବୁନି ଭୁଲି ସେ ଆତ୍ମବଳି

ତାଙ୍କରି ମହାର୍ଘ ପ୍ରତି ରକ୍ତବିନ୍ଦୁ

ଦେଉଥିବୁ ବାଢ଼ି ଭକ୍ତି ଶ୍ରଦ୍ଧାଞ୍ଜଳି ।

ଆଜିର ଅମୃତ ମହୋତ୍ସବ ପାଇଁ

ଜାତିପ୍ରେମ ହୃଦେ ହେଉ ଉଜ୍ଜୀବିତ

ଶାନ୍ତି ମୈତ୍ରୀ ଭାତୃଭାବେ ହୋଇ ବନ୍ଧା

ଗାଇବା ଆମେରେ ଜାତୀୟ ସଙ୍ଗୀତ ।