କିଏ ଜାଣିଥିଲା

କିଛି ପୃଷ୍ଠା ଲେଖିଥିଲି ତୁମପାଇଁ

ପଢି ଶୁଣାଇବି ବୋଲି,

କିଏ ଜାଣିଥିଲା ପଢ଼ିବା ଆଗରୁ

ଏମିତି ଚିରିବ ବୋଲି !

ଫୁଲଗଛଟିଏ ଲଗାଇଥିଲି ମୁଁ

ଫୁଲଟେ ଫୁଟିବ ବୋଲି,

କିଏ ଜାଣିଥିଲା ଫୁଟିବା ଆଗରୁ

ଗଛ ମରିଯିବ ବୋଲି !

ବାଲିଘରଟିଏ ତୋଳି ବସିଥିଲି

ତୁମେ ଖୁସିହେବ ବୋଲି,

କିଏ ଜାଣିଥିଲା ସହସା ଝଡ଼ରେ

ମାଟିରେ ମିଶିବ ବୋଲି !

ସପନର ମୋତି ସାଉଁଟିଥିଲି ମୁଁ

ଉପହାର ଦେବି ବୋଲି,

କିଏ ଜାଣିଥିଲା ପିନ୍ଧିବା ଆଗରୁ

ସେ ହାର ଛିଡ଼ିବ ବୋଲି !

ଅସରା ପ୍ରେମର ସାଗର କୂଳରେ

ତୁମକୁ ମୁଁ ପାଇଥିଲି,

କିଏ ଜାଣିଥିଲା ଛୁଇଁବା ଆଗରୁ

ତୁମେ ହଜିଯିବ ବୋଲି !