କିଛି ଉପଦେଶ

ପିତା ମାତା ପରା  ଜଗତରେ ଶ୍ରେଷ୍ଠ

ସନ୍ତାନ ଲଭି କରୁଣା,

ଦୁନିଆ ଦାଣ୍ଡରେ  ପିଲା ପରିଚିତ

ଏହିତ ଅଟଇ ଜଣା ।

ଦେଇ ଥିଲେ ପାଇ  ଏହି ନ୍ଯାୟ ସୂତ୍ରେ

ପାଆନ୍ତି ସର୍ବେ ପାଉଣା,

ଯେମିତି କର୍ମକୁ  ସେମିତିକା ଫଳ

ପ୍ରଭୁଙ୍କର ନିର୍ଦେଶନା ।

ଉଚ୍ଚ ସ୍ବରେ କଥା  ମାଆଙ୍କ ସହିତ

କେବେ ବି କହିବ ନାହିଁ,

ସେ ପରା ନିଜର  ଅଟନ୍ତି ଜନନୀ

କଥା ଶିଖାଇଲେ କହି ।

                                        

ବାପା ଓ ମାଆଙ୍କୁ  କରିବନି ଭାଗ

ନୁହଁନ୍ତି କେବେ ସମ୍ପତ୍ତି,

ସେ ପରା ଅଟନ୍ତି   ଚଳନ୍ତି ଠାକୁର

ସେ ତୁମଙ୍କୁ ଗଢିଛନ୍ତି ।

କଥାରେ କଥାରେ  ନିଜର ଭାଗ୍ୟକୁ

ଯିଏ କରୁଥାଏ ନିନ୍ଦା,

କର୍ମକୁ ଦୂରେଇ  ଅନ୍ୟର ଉପରେ

ନିର୍ଭର କରିବା ଧନ୍ଦା ।

ଅଳସୁଆ ମୂର୍ଖ  ପ୍ରମାଣିତ ହୁଏ

ସଦା ପାଉଥାଏ ନିନ୍ଦା,

ସେହି ଲୋକ ଠାରୁ  ଦୂରେଇ ରହିବ

ମିଳି ନକରିବ ଧନ୍ଦା ।

ଆବଶ୍ୟକ ଠାରୁ  ଅଧିକ ମାତ୍ରାରେ

କରେ ଶୟନ ଭକ୍ଷଣ,

ଅରଜିଲା ଅର୍ଥ  ଅକୁଳାଣ ହୁଏ

ଏତ ଦରୀଦ୍ର ଲକ୍ଷଣ ।

ଅଳସୁଆ ପଣ  ପରିତ୍ୟାଗ କରି

କର୍ମଠ ହୁଏ ଯେ ଜନ,

ଜୀବନରେ ସେହି  ସବୁଠାରୁ ସୁଖୀ

ବିଭୁ ପଦେ ଥାଏ ମନ ।

ନିଜର ମନଟା  ଅଳିଆ ପାତ୍ରଟେ

ସଦା ତାକୁ ସଫା ରଖ,

ନିଜେ ନିଜ କର୍ମ  କରି ଚାଲୁଥାଅ

ନିଜର ଆନନ୍ଦ ଦେଖ ।