ମନ ମୟୂରୀ
ମନ ମୟୂରୀ
ମୋ ମନ ମୟୂରୀ ସ୍ଵର୍ଗ ଅପସରୀ
ମୋ ମନକୁ କଲ ଚୋରି,
ସମ୍ମୁଖେ ଆସିଲେ ଲାଜ କରୁଥିଲ
ଲାଜକୁଳୀ ଲତା ପରି ।
ତୁମ ଗଣ୍ଡ ଦେଶ ଗୋଲାପ ସଦୃଶ୍ୟ
ରକ୍ତବର୍ଣ୍ଣ ଦିଶୁଥାଇ,
ଥିରି ଥିରି କରି ଆଖି ଦିଅ ଠାରି
ପ୍ରେମର ପରଶ ପାଇଁ ।
ନିରୋଳା ରାତିରେ ବାଦଲ ଉହାଡେ
ସ୍ଵପ୍ନରେ ତୁମକୁ ଦେଖେ,
ତୁମ ବିନା ରାତି ଲାଗେ ନାହିଁ ଭଲ
ତୁମକୁ ଖୋଜେ ମୁଁ ପାଖେ ।
ସୁମଧୁର ମହୁ ତୁମ ଓଠୁ ଝରେ
ଓଠ ମୋର ବ୍ଯଗ୍ର ଖାଲି,
ହୃଦୟ ଷ୍ପନ୍ଦନ ବଢିଯାଏ ମୋର
ଚୁମ୍ବନ ଆଙ୍କିବି ବୋଲି ।
ମଲ୍ଲୀର ଗଜରା ଗଭାରେ ବାନ୍ଧିଛ
ମୋତେ କରେ ଆକର୍ଷଣ,
ପ୍ରୀତି ମନୋବାଞ୍ଛା ଦୁହିଁଙ୍କର ଈଚ୍ଛା
ମିଳନେ ହେବ ପୂରଣ ।
ଯେବେ ତୁମେ ହସ ଚାନ୍ଦ ପରି ଦିଶ
କାହିଁକି ଅଛ ମଉନ,
କହିଦିଅ ବାରେ ମୋହରି କାନରେ
ତୁମେ ମୋ ପରାଣ ଧନ ।