ମୋ ମାମୁଁଘର-----------ଜହ୍ନ ରାଇଜରେ ମାମୁଁଘର ମୋର

ଜହ୍ନ ରାଇଜରେ  ମାମୁଁଘର ମୋର

ଚନ୍ଦ୍ରଯାନେ ଯିବି ବସି

ମାମୁଁ ମାଇଁ ମୋର ଦେଖିଲେ ତାଙ୍କର

ଭଣଜାକୁ ହେବେ ଖୁସି  ।

ଦିନେ ଦିନେ କରି  ଗୋଟେ ଗୋଟେ ମାଇଁ ମୋତେ ଯେ ଆଦର କରି

ଜଣେ ଖୋଇ ଦେଲେ ଦୁଧ ଭାତ ମୋତେ

ଆନ ଖୋଇ ଦେବେ ଖିରି  ।

ସତାଇଶ ମାଇଁ    ଏମିତି ଏମିତି 

ସ୍ଵାଦିଷ୍ଟ ବ୍ଯଞ୍ଜନ ଖୋଇ

ସୁନା ପଲଙ୍କରେ  ଗେହ୍ଲ କରି ମୋତେ

ନିତି ଦେଉଥିବେ ଶୋଇ  ।

ମାମୁଁ ଆଣି ଦେବେ  କେତେ ଯେ ଦରବ

ତାଙ୍କ ଗ୍ରାମ ବୁଲାଇବେ,

କେମିତି ରୋଭର  ଫୋଟୋ ତୋଳୁ ଅଛି

ମୋତେ ସବୁ କହି ଦେବେ  ।

ଆହୁରି ଦେଖିବି   ଦରିଆ ପାହାଡ଼

ନଦ ନଦୀ ଆଉ ଝର

କେମିତି ଦିଶନ୍ତି  ଜହ୍ନ ରାଇଜରେ

କୀଟ ପଶୁ ପକ୍ଷୀ ନର  ।

କେମିତି ମାମୁଁ ମୋ  ଆଲୋକରେ ବଢେ

ପନ୍ଦର ରେ ପୂର୍ଣ୍ଣ ହୁଏ

ଅନ୍ଧାର ଆସିଲେ କ୍ଷୀଣ ହୋଇ ହୋଇ

ପନ୍ଦରରେ ହଜି ଯାଏ  ।

ଏକ ମାସ ରହି    ଜହ୍ନ ରାଇଜରେ

ଘରକୁ ଆସିବି ଫେରି

ଯେତେ ସବୁ ସ୍ମୃତି  ସାଉଁଟି ଆଣିବି

ଅଣ୍ଟାରେ ଅଣ୍ଟିଏ ଭରି  ।