Library
କି ଦୋଷ ତୋର କଲିରେ କାଳିଆ
କି ଦୋଷ ତୋର କଲିରେ କାଳିଆ
କି ଦୋଷ ତୋର କଲିରେ କାଳିଆ
କଲୁ ଏତେ ହୀନିମାନ
ଟିକିଏ ହସ ତୁ ଓଠେ ଭରି ଦେଇ
ଜାଳି ଦେଲୁ ମୋ ଜୀବନ ।
ଛଡେଇ ନେଇ ତୁ ମୋ ଜୀବନ ଖୁସି
କେମିତି ହସୁଛୁ ଆଜି
ଉପରେ ଫୁଲ ତୁ ବଛେଇ ଦେଲୁରେ
ଭିତରେ କଣ୍ଟାକୁ ରଖି ।
କେମିତି ଜାଣିବି ଥିଲା ତୋ ଛଳନା
ବୁଝି ପାରିଲିନି ମୁଁ ତୋ ବାହାନା
ଏଡିକି କପଟି ମନ ।
ଟିକିଏ ହସ ତୁ ଭରି ଦେଇ ଓଠେ
ଜାଳି ଦେଲୁ ମୋ ଜୀବନ ।
ମୋ ଦୁନିଆରେ ଭଲରେ ମୁଁ ଥିଲି
ତୁ ଦେଲୁ ହାତ ବଢେଇ
ତୋ ହାତ ଧରି ଚାଲିଲି ମୁଁ ଯେବେ
ହାତ ତୁ ନେଲୁ ଛଡେଇ ।
ଲୁହର ଶ୍ରାବଣେ ମୁଁ ଭିଜୁଥିଲି
ଫଗୁଣ ଆଣିଲୁ ଡାକି
ଏମିତିକା ରଙ୍ଗ ଦେହେ ବୋଳି ଦେଲୁ
ନା ପାରିବ କେବେ ସେ ଲିଭି ।
ଏତେ ଖୁସି ଦେଲୁ ସହି ମୁଁ ପାରୁନି
ଏତେ ହସ ଦେଲୁ ଲୁହ ମୋ ଶୁଖୁନି
ଧନ୍ୟ ପତିତପାବନ ।
ଟିକିଏ ହସ ତୁ ମୋ ଓଠରେ ଦେଇ
ଜାଳି ଦେଲୁ ମୋ ଜୀବନ ।
ଚାହିଁ ମୁଁ ନ ଥିଲି ତୋଳିବାକୁ ଘର
ଦେଲୁରେ ସିନ୍ଦୁର ଗାର
ମିଛରେ ଭଣ୍ଡେଇ ସୁଖର ସଂସାର
ଭାଙ୍ଗି ଦେଲୁ ଶଙ୍ଖା ମୋର
ଅଢେଇ ଦିନକୁ କରିଲୁ ତୁ ଖେଳା
ଲିଭିନି ପାଦୁ ଅଳତା
କେମିତି ଜଳିଲା ମଶାଣୀ ଭୂଇଁର
ଜୁଇରେ ଆଜିରେ ଚିତା ।
କେମିତି ସହୁଛୁ ତୁରେ କାଳିଆ
ସହିରେ ପାରୁନି ମୁଁ ନୀଳାଚଳିଆ
ଏତେ ବଡ ସନମାନ ।
ଟିକିଏ ଖୁସି ତୁ ମୋ ଓଠରେ ଦେଇ
ଜାଳି ଦେଲୁ ମୋ ଜୀବନ ।
ଉପରେ ଉପରେ ପାଣି ତୁ ଛିଞ୍ଚିଣ
ଭିତରେ କାଟିଲୁ ଚେର
କେଉଁ ଜନମର ପ୍ରତିଶୋଧ ଆଜି
ନେଇଗଲୁ ଚକ୍ରଧର ।
ପ୍ରତିଶୋଧ ଯଦି ନେଉଛୁ କାଳିଆ
ଭଲକି ତୁ ନେଇଯାଆ
ମଶାଣୀ ଭୂଇଁରେ ଜଳି ଯାଉ ଆଜି
ଦୁଇଟିରେ ଚିତା ନିଆଁ ।
ସରିବ ତୋ ଖେଳ ସରିବ ମୋ କାଳ
କହିବେନି କେହି କାହାକୁ ଆଦିମୂଳ
ଲିଭେଇ ଦେ ତୁ ଚିହ୍ନ ।
କି ଦୋଷ ତୋର କଲିରେ କାଳିଆ
କଲୁ ଏତେ ହୀନିମାନ ।
