Library
Profile
ଖୁସିର ଠିକଣା
ଖୁସିର ଠିକଣା
ଲୁହର ଅଚିହ୍ନା ଇଲାକାରୁ
ହସର ଠିକଣା ଖୋଜୁଥିଲି
କିନ୍ତୁ ପାଉନଥିଲି
ପଦ୍ମ ଭଳି ଘୁଞ୍ଚି ଯାଉଥିଲା
ତାର ପ୍ରତିଟି ପାଖୁଡା
କୁହୁଡି ପହଁରିବାର ନିଶାରେ
ମୁଁ ଧାଉଁଥିଲି ଆଗକୁ ଆଗକୁ
ତଥାପି ଆଖି ପତାରେ ଲାଗିଥିଲା
ସ୍ୱପ୍ନର କୁହୁକ ଛୁଆଁ
ମନର ଅରମା ବଣରେ ଫୁଟୁଥିଲା
ଅନେକ ବଣମଲ୍ଲୀ
ମୁକୁଳି ପାରୁନଥିଲି
ମାୟାପୁରୀର ବନ୍ଧନରୁ
ଅବଶ ଦେହ ଆଉ ମନକୁ ନେଇ
ଖୋଜୁଥିଲି ଖୁସିର ସୁନା ହରିଣୀ
ଅଗନା ଅଗନି ବନସ୍ତରେ
ସେ ଖେଳୁଥିଲା ଲୁଚକାଳୀ
ପରିହାସ କରୁଥିଲା ମୋତେ
କହୁଥିଲା ପାରୁଛୁତ ଧରିନେ ମୋତେ
ହାତ ମୁଠାରେ ସାଉଁଟିନେ
ଦୁନିଆର ସବୁ ଖୁସିକୁ
ଉପଭୋଗ କର ଜୀବନର ପ୍ରତିଟି ମୁହୂର୍ତ୍ତ
ମୁଁ କିନ୍ତୁ ପାରୁନଥିଲି
ମୋ ଆଖି ସାମ୍ନାରୁ
ସେ ଚାଲି ଯାଉଥିଲା ଦୂରକୁ
ଦୂରକୁ
ଯେଉଁଠି ପହଞ୍ଚିବାର ରାସ୍ତା ସରିଥିଲା
ଯେଉଁଠି ସମୁଦ୍ରର ଢେଉ ସବୁ
ହାତଠାରି ଜହ୍ନକୁ ଡାକୁଥିଲେ
ନୀଳ କଇଁ ବି ଥିଲା
ଚାନ୍ଦର ପ୍ରତୀକ୍ଷାରେ
ପକ୍ଷୀର କାକଳିରେ ଶୁଭୁଥିଲା
କେଉଁ ଏକ ଅବୁଝା ସଙ୍ଗୀତର
ମଧୁର ମୂର୍ଛନା
ପାହାଡ ସେପାଖୁ କାହା
ବିହ୍ୱଳିତ ବଂଶୀର ସ୍ୱର
ତୋଳୁଥିଲା ମୂର୍ଛିତ କରୁଣ ରାଗିଣୀ
ସେଇ ଦୂର ଦିଗବଳୟରେ
ସେ ଲୁଚିଗଲା ବିନ୍ଦୁଟିଏ ହେଇ
ଫିଟେଇ ଦେଇଗଲା ମୋ ମନରେ ଥିବା
ଅନେକ ଅଡୁଆ ସୂତାର ଖିଅ
ମୁଁ ଭାବୁଥିଲି ଆଖିର ଲୁହ ସବୁକୁ
ଓଠ ପିଇଗଲା ପରେ
ଯାହା ବଳେ ତା ନାଁ ବୋଧେ ହସ
ମନ ତଳର ଅକୁହା ଦୁଃଖକୁ
ହୃଦୟରେ ସାଇତିଲା ପରେ
ଯାହା ବଳେ ତା ନାଁ ବୋଧେ ଖୁସି
ଏଇ ବୋଧେ ହସ ଆଉ ଖୁସିର ଠିକଣା
କେବେ ଲାଗେ ଜଣା ତ ପୁଣି କେବେ ଅଜଣା...
