ଖୁସିର ଶିଖର

ନିରାଶାରେ ଘେରା ଜୀବନ ଯେଉଁଠି

ଅଶାର ଆଲୋକ ଛୁଏଁ,

ପ୍ରହେଳିକା ପ୍ରଶ୍ନବାଚୀର ମରମ

ଛାଏଁ ଛାଏଁ ବୁଝିହୁଏ । [୧]

ବହୁ ପ୍ରତୀକ୍ଷିତ, ଜୀବନରେ ଯଦି

ସୁଖ-ଲବ୍ଧ ହୋଇଯାଏ,

ଚିର ଇପିସିତ ଅପ୍ରାପ୍ୟ ସେଇଠି

ପ୍ରାପ୍ତିରେ ବଦଳିଯାଏ । [୨]

ମରଣ ଦୁଆରେ ଜୀବନ ଦାନର

ଆଶୀର୍ବାଦ ଯେବେ ମିଳେ,

ଅସୀମ ଆନନ୍ଦ ପହଞ୍ଚାଇ ଦିଏ

କାଞ୍ଚନଜଂଘାର ଚୂଳେ । [୩]

ଗହନ ମନର ଅକୁହା ଭାବକୁ

ମନ ମିତ ବୁଝିଗଲେ,

ମିଠା ମିଠା କେତେ ଖୁସିର ଲହରୀ

ଖେଳିଯାଏ ମନତଳେ । [୪]

ଭାବନା ସହିତ କରମ ଯେଉଁଠି

ସରଳ ରେଖାରେ ମିଶେ ,

ମନ ବିବେକର ସୁନ୍ଦର ମେଳକେ

ଜୀବନ ଦିବ୍ୟ ପରଶେ । [୫]

ଦୁଃଖର କାରଣ ଠଉରେଇ, ତାଠୁ

ଦୂରେଇବା ଟାଣ ପଣ-

ମନେ ଭିଡି, ବାଟ ଆଗେଇ ଚାଲିଲେ

ଖୁସି ମିଳେ ସୀମାହୀନ । [୬]

ଦୟା, କ୍ଷମା, ଆତ୍ମ-ସନ୍ତୋଷ ଚିତ୍ତଟି

ହେଲେ ଚିର ସହଚର,

ଦିବ୍ୟ ଚେତନାରେ ଜୀବନ ପହଞ୍ଚେ

ଖୁସିର ଉଚ୍ଚ ଶିଖର । [୭]