ଖୁସି

ଜୀବନ ସାଗରରେ 

ଅବିରତ ଜୁଆର ଓ ଭଟ୍ଟା 

ତା'ରି ଭିତରେ ବେଳାଭୂମିରୁ 

ଖୋଜିବାକୁ ହୁଏ ଖୁସିର ଶାମୁକା ।

  ରୁକ୍ଷ ଶାମୁକାରେ ଛୁପିଅଛି ମୋତି 

  ଛୋଟ ବଡ ଶାମୁକା ସାଉଁଟି

  ଖୁସି-ମୋତି ମାଳାରେ 

   ପାରିଲେ ସଜେଇ 

   ଜୀବନ  ସୁନ୍ଦର ।

ଖୁସି ଦିଏ, ପିଲାଦିନେ 

ବାଗୁଡି, ବୋହୁଚୋରୀ- ଜିତାପଟ୍, 

ଆକସ୍ମିକ ଛୁଟିର ଘୋଷଣା, 

ବର୍ଷାପାଣିରେ କାଗଜ ଡଙ୍ଗା, 

ତ କେବେ ପୁଣି ବାଉଁଶରାଣୀର ଖେଳ।

  ଖୁସି ଲାଗେ ପରୀକ୍ଷା ଫଳ ଭଲ ଥିଲେ 

  ପାଇଲେ ମନ ଲାଖି ଖାଇବା,

  କି - ପସନ୍ଦର ଗହଣା ଖଣ୍ଡେ, 

  ନୂଆ ପୋଷାକଟିଏ ,

  ଆଉ ପୁଣି ଖୁସିଲାଗେ ଶୁଣିଲେ 

  ପ୍ରଶଂସା ବାପାଙ୍କ ତୁଣ୍ଡର ।

ଚାଲ ସାଥୀ 

ପ୍ରଶସ୍ତ ଭିଜା ଭିଜା ସିକତା ଭୂଇଁରୁ 

ସାଉଁଟିବା ଶାମୁକା 

ବେଳ ଥାଉ ଥାଉ, ଗୁନ୍ଥି ମୋତି ମାଳା

ସଜାଇବା ସମୟ ଆମର 

ସଂଚାରିବା ଧମନୀରେ ପ୍ରବାହ ଖୁସିର।