ଖୋଜୁଛି ମୁଁ ତୁମକୁ
ଖୋଜୁଛି ମୁଁ ତୁମକୁ
ଖୋଜୁଛି ମୁଁ ତୁମକୁ ଆକାଶ ହୋଇ
ଏଇ ବାଦଳ ମଧ୍ୟରେ,
କାଳେ ଭାସି ଯାଇଥିବ ଭସା ବାଦଲ ପରି
ଏଇ ସମୟର ସୁଅରେ ।
ଖୋଜୁଛି ମୁଁ ତୁମକୁ ନଦୀଟିଏ ହୋଇ
ଏଇ ବିଶାଳ ସମୁଦ୍ରରେ,
କାଳେ ମୋ ପ୍ରତି ଅଭିମାନ କରି ଲୁଚିଥିବ
ଏଇ ସମୁଦ୍ର ଗର୍ଭରେ ।
ଖୋଜୁଛି ମୁଁ ତୁମକୁ ପକ୍ଷୀଟିଏ ହୋଇ
ଏଇ ସବୁଜଶସ୍ୟ କ୍ଷେତ୍ରରେ,
କାଳେ କୀଟଟିଏ ହୋଇ ଲଖିଯାଇଥିବ
ସୁନ୍ଦର ଶସ୍ୟ ବକ୍ଷରେ ।
ଖୋଜୁଛି ମୁଁ ତୁମକୁ ପଥିକଟିଏ ହୋଇ
ଏଇ ଦୂର ପାହାଡ଼ରେ,
କାଳେ ଝରଣା ହୋଇ ତୁନି ପଡ଼ିଥିବ
ପଶୁପକ୍ଷୀଙ୍କର ଭୟରେ ।
ଖୋଜୁଛି ମୁଁ ତୁମକୁ ମଧୂମକ୍ଷୀ ହୋଇ
ଏଇ ବୃହତ୍ ଜଙ୍ଗଲରେ,
କାଳେ ଫୁଲଟିଏ ହୋଇ ରହିଯାଇଥିବ
ଏକ ବୃକ୍ଷର ଶରୀରରେ ।
ଖୋଜୁଛି ମୁଁ ତୁମକୁ ଓଟଟିଏ ହୋଇ
ଏଇ ସୁଦୂର ମରୁଭୂମିରେ,
କାଳେ ବରଷା ହୋଇ ବରଷି ଯିବ ବୋଲି
ଏଇ ତୃଷାକ୍ତ ଜୀବନରେ ।।