ଖାଇବା ଆଗରୁ ଧୋଇବା ହାତ
ଖାଇବା ଆଗରୁ ଧୋଇବା ହାତ
ବଦଳି ଯାଇଛି ଚଗଲା କୁନାଟା
କରୁନି ଅଳି ଅଝଟ
ମାଆଙ୍କ କଥାକୁ କରିଛି ସେ ଗଣ୍ଠି
ହେଉ ନାହିଁ ଆଉ ଦୁଷ୍ଟ ।
କହିଛନ୍ତି ମାଆ ବହୁତ ବୁଝାଇ
ରୋଗର ମୂଳ କାରଣ
ଜୀବାଣୁ ଭୂତାଣୁ ଦିଶେନି ଆଖିକୁ
ଅଟନ୍ତି ବଡ ଭୀଷଣ ।
ରାସ୍ତାରେ ଖୋଲାରେ ବୁଲାଇ ବିକନ୍ତି
ଦହିବରା ଆଳୁଦମ
ମିଠାଇ ଉପରେ ଜମେ ମଧ୍ଯ ଧୂଳି
ଖାଦ୍ଯ ହୁଏ ପ୍ରଦୂଷଣ ।
ମୂଲ୍ଯ ଦେଇ ଆମେ ଖାଆନ୍ତି କିଣିକି
ଶୁଖିଲା ବଜାର ଦ୍ରବ୍ଯ
ମିଶିଥାଏ ତହିଁ ରସାୟନ ମାନ
ସୃଷ୍ଟି କରେ ନାନା ରୋଗ ।
ଅତି ଆଗ୍ରହରେ ସାଙ୍ଗଙ୍କୁ ଦେଖିକି
ସମ୍ଭାଳୁ ନଥିଲା ମନ
କରୁଥିଲା କୁନା ଅଳି ଓ ଅଝଟ
ଲୋଭେ ହୋଇ ଛନଛନ।
ହାତକୁ ନଧୋଇ ଦେଉଥିଲା ଖାଇ
ମଜାଦାର ଚଟାପଟ
ଜ୍ବର ଓ ଝାଡାରେ ହୋଇଲା ପୀଡିତ
କଷ୍ଟେ ହେଲା ଛଟପଟ ।
ନେଲା ସାଲାଇନ ଇଞ୍ଜେକ୍ସନ ପୁଣି
ଖାଇଲା ନୀତି ବଟିକା
ଧୀରେ ଧୀରେ ସିଏ ହୋଇଲା ଆରୋଗ୍ଯ
ସାତଦିନ ପରେ ଏକା ।
ଆସିଗଲା ପୁଣି ରୋଗ ମହାମାରୀ
କୋଭିଡ ତାହାର ନାମ
ବାହାରକୁ ଯିବା ହୋଇଲା ବାରଣ
ସ୍କୁଲ ହୋଇଗଲା ବନ୍ଦ ।
ନକରି ଗହଳି ଦୂରତା ରକ୍ଷାକୁ
ସଭିଏଁ ଦେଲେ ଗୁରୁତ୍ବ
ଛିଙ୍କ ଆଉ କାଶ କରିବାକୁ ରୋଧ
ମୁହଁରେ ବାନ୍ଧିଲେ ମାସ୍କ ।
କରାଳ ସ୍ବରୂପ ବଡ ଭୟଙ୍କର
ମହାମାରୀ ରୋଗ ଦାଉ
ନିଜ ସହ କ୍ଷତି କରଇ ଅନ୍ଯର
ସଂଙ୍କ୍ରାମକ ବଡ ସେହୁ ।
ଦେଖିଅଛି କୁନା ନିଜର ଆଖିରେ
ମହାମାରୀ ବିଭୀଷିକା
ଲଅକ ଡାଉନ ସଅଟ ଡାଉନ
ଲୋକଙ୍କର ଦୁରାବସ୍ଥା ।
ମାଆ କଥା ମାନି ଧୋଉଛି ସେ ହାତ
ଆଗପରି ନୀତିଦିନ
ସାବୁନ ଲଗାଇ ନ ଧୋଇଲେ ହାତ
ରୁଚେ ନାହିଁ ତାକୁ ଅନ୍ନ ।
ମଇଳା ହାତରେ ନଖର କୋଣରେ
ରୋଗ ଜୀବାଣୁଙ୍କ ବାସ
ହାତକୁ ଧୋଇକି ଆହାର କରିବା
ଅଟେ ଉତ୍ତମ ଅଭ୍ୟାସ ।
ସାଙ୍ଗଙ୍କୁ ବୁଝାଇ କହେ ଏବେ କୁନା
ଆସ ହେବା ସୁନାପିଲା
ଖାଇବା ଆଗରୁ ହାତକୁ ଧୋଇବା
ସ୍ବାସ୍ଥ୍ୟ ହିଁ ସମ୍ପଦ ପରା ।