କେହି ଜଣେ

କେହି ଜଣେ ଆସୁଛି

ମତେ ଛୁଇଁ ଦେବାକୁ ଲିଭେଇ

ମୁଁ ଯେଉଁଠି ନୀତି ଜଳେ

ସେଇଠି ସେ ଜହ୍ନ ଟିଏ ଥୋଇ ।

କେହି ଜଣେ ଆସୁଛି

ନୂଆ କିଛି ଲେଖି ଦେବା ପାଇଁ

ମୁଁ ଯାହା ଯେତିକି ଜାଣେ

ସବୁ ଭୂଲ୍ କହି ଦେବା ପାଇଁ ।

କେହି ଜଣେ ଆସୁଛି

ଅସ୍ତ୍ରହୀନ ଆକ୍ରମଣ ପାଇଁ

ହାରିକି ଜିତିବା ଆଉ

ଜିତିକି ହାରିଯିବା ପାଇଁ।

ମୁଁ ଏବେ ଅନ୍ତର୍ଦ୍ଧାନ

ଖୋଜିବୁଲେ ଜୀବନ ମଧ୍ୟାହ୍ନ

ନିରୁତା ବୈଶାଖ ବକ୍ଷେ 

ଏ କାହାର ସ୍ନିଗ୍ଧ ଆବରଣ

କେହି ଜଣେ ଚାହୁଁଛି 

ତା ଆଖିରେ ପ୍ରଶ୍ନଟିଏ ନେଇ ।

ଇଏ କଣ ସେଇ ଆଖି ?

ଯେଉଁ ଆଖି ବୁଡ଼ିଯିବା ପାଇଁ ।

ନାଉରୀର ଗୀତ ଆଉ

ନୋଉକାର ହୃଦୟକୁ ନେଇ

ନଦୀର ଧର୍ମ ବହିବା

ସବୁ ଘାତ ପ୍ରତିଘାତ ଡେଇଁ ।

ଦୁଇ କପ୍ ଆକାଶରେ

ଚାରି କପ୍ ଜଙ୍ଗଲ ମିଶେଇ

କେହି ଜଣେ ଡାକୁଛି ।

ପକ୍ଷୀକୁ ଡେଣା ଦେବା ପାଇଁ ।।