କବିତା ପର୍ବ : ଗୀତି କବିତା-10 : ମାଟି : -ଡକ୍ଟର କୃତ୍ତିବାସ ନାୟକ

ମାଟିର ପିଣ୍ଡରୁ ଛାଡ଼ିଗଲେ ପ୍ରାଣ ସିଏ ତ ମରଣ ନୁହେଁ,

ଅସଲ ମରଣ ପ୍ରେମ କରୁକରୁ ଯଦି ପ୍ରତାରଣା ହୁଏ | (ଘୋଷା)

ମୁହଁର ହସକୁ ଦେଖିଦେଲେ ତୁମେ ବୁଝିବନି ସୁଖୀ ବୋଲି,

ଅନ୍ତର ଯଦି କାନ୍ଦୁଥାଏ କା'ର ସେ ହସ ଛଳନା ଖାଲି |

ମନର ବ୍ୟଥାକୁ ବୁଝିବାକୁ ଅବା ସମୟ କାହାର ଥାଏ ?

ମାଟିର ପିଣ୍ଡରୁ ଛାଡ଼ିଗଲେ ପ୍ରାଣ ସିଏ ତ ମରଣ ନୁହେଁ | (1)

ଅପସରି ଗଲେ ମରମ ତଳକୁ ପ୍ରଣୟର ନୂଆ ତାତି,

ବେସୁରା ହୋଇବ ପ୍ରୀତି ରାଗିଣୀର ଆମର ଜୀବନ ଗୀତି |

ଆସ ଆଉଥରେ ଧରାଧରି ହୋଇ ବଞ୍ଚିବା ଶିଖିବା ଦୁହେଁ |

ମାଟିର ପିଣ୍ଡରୁ ଛାଡ଼ିଗଲେ ପ୍ରାଣ ସିଏ ତ ମରଣ ନୁହେଁ | (2)