କବିତା ପର୍ବ : ଗୀତି କବିତା-09 : ଅଫୁଟା ଫୁଲ : -ଡକ୍ଟର କୃତ୍ତିବାସ ନାୟକ

ଅଫୁଟା କଢିଟି ଫୁଟିଗଲା ଦିନେ ମୋର ମନ ଉପବନେ,

ସେ ଫୁଲରେ ମୁହିଁ ବାସ ଭରିଦେଲି ତା' ପ୍ରେମର ପ୍ରତିଦାନେ | (ଘୋଷା)

ଦୁନିଆ ନ ଜାଣୁ ସେ ଫୁଲର ମୂଲ ମୁଁ ଏକା ଜାଣିଲେ ହେଲା,

ସିଏ ମହକିଲା ମୁଁ ମହକିଲି ହେଇଥିଲୁ ମତୁଆଲା |

ଭଲପାଏ ବୋଲି କହିଲାନି ସିଏ ମୁଁ ବି କହିନି ଦିନେ |

ଅଫୁଟା ଫୁଲ ସେ ଫୁଟିଗଲା ଦିନେ ମୋର ମନ ଉପବନେ | (1)

ସିଏ ମାଗିନାହିଁ ଆକାଶର ଚାନ୍ଦ ମୁଁ ମାଗିନାହିଁ ତାରା,

ମୋର ହୃଦୟରେ ରହିଲା ରହିଛି ରହିବ ଜୀବନ ସାରା |

ଅଭିଯୋଗ କିବା ଅନୁରୋଧ କେବେ କରିନାହିଁ ଅଭିମାନେ |

ଅଫୁଟା ଫୁଲ ସେ ଫୁଟିଗଲା ଦିନେ ମୋର ମନ ଉପବନେ | (2)