ପ୍ଲାଟଫର୍ମ

ଏଇତ ଟ୍ରେନ୍ ହର୍ଣ୍ ଶୁଭିଲାଣି 

ତମେ ଏବେ ଚାଲିଯିବ 

ପୁଣି କାଲି ଦେଖାହବା କିଛି ମିଠା ସ୍ମୃତିକୁ ନେଇ 

କିଛି ମାନ, ଅଭିମାନ ଆଉ କିଛି ପ୍ରେମ

ଏ ସମୟଟା ବି କେତେ ଶୀଘ୍ର ଧାଇଁଚି 

ରାତି ୯ଟା ବାଜିଗଲାଣି 

ଦେଖିକି ଯିବ, ଘରେ ପହଞ୍ଚି କଲ୍ କରିବ 

ଆହା ! ଏଇ ମିଠା କଥା ଆମେ ଛାଡି ଯାଇଥିଲେ ନା-

ଏଇ ପ୍ଲାଟଫର୍ମ ରେ 

ଆଜି ଆମେ ଦୁଇଜଣ ବୟସର ଅପରାହ୍ନରେ 

ଠିକ୍ ସେଦିନ ଭଳି ପାଖାପାଖି ବସିଛେ 

ସମୟ ବି ଚାଲିଚି ତା ବାଟରେ 

ଖାଲି ଫରକ ଏତିକି ଯେ, 

ସେଦିନର ସେଇ ଅଭିମାନି ପ୍ରେମିକା ଆଜି ତମ ପତ୍ନୀ 

ବୟସର ଚପଳତା ନାହିଁ, ଅଛି ଯାହା ଭସା ଭସା ଢେଉ 

ଏଇତ ଟ୍ରେନ୍ ଆସିଗଲା 

ଆଜି ତମେ ଏକା ନୁହେଁ, ଚାଲ ସାଙ୍ଗ ହେଇ ଯିବା।