କବିତା ଆଳାପ-26 : (ତୃତୀୟ ସପ୍ତାହ) କରୋନା ସହିତ ସଂଘର୍ଷ
କବିତା ଆଳାପ-26 : (ତୃତୀୟ ସପ୍ତାହ) କରୋନା ସହିତ ସଂଘର୍ଷ
କରୋନା କୋଭିଡ଼ ଚହଳ ପକାଇ ବ୍ୟାପିଲା ଦୁଇଶ' ଦେଶକୁ,
ଆତଙ୍କ ଖେଳାଇ ଦମ୍ଭ ଦୋହଲାଇ ଡରାଇଲା କୋଟି ଲୋକଙ୍କୁ |
ବୁଢ଼ାବୁଢ଼ୀ ରୋଗୀ ହରାଇଲେ ପ୍ରାଣ ଶ୍ଵାସରୁଦ୍ଧ ହେଲା ତାଙ୍କର,
କିଡ଼ିନ ସୁଗାର ରୋଗୀ ହଟହଟା ଯତ୍ନ ପାଇ ହେଲେ ଉଦ୍ଧାର |
ରକ୍ତଚାପ ରୋଗୀ ହୋଇଲେ ଛାନିଆଁ ଭୟରେ ହୃଦୟ ଥରିଲା,
ଆତଙ୍କିତ ମନେ ଦୁର୍ବଳ ହୋଇଲେ ହାର୍ଟ ଆଟାକ ହୋଇଲା |
ଛୁଆଁରୋଗ ଏହି କୋଭିଡ଼ ରୋଗଟି ଭୂତାଣୁ ମାଧ୍ୟମ ତାହାର,
ଅବହେଳା ପାଇଁ କୋଭିଡ଼ ଡେଇଁଲା ଯୁବକଙ୍କୁ କଲା ଆହାର |
ଥଣ୍ଡା କାଶ ଜ୍ୱର କଫରୋଗ ପରି କୋଭିଡ଼ ରୋଗର ଲକ୍ଷଣ,
ସାହସ ହରେଇ ଭୟଭୀତ ହେଲେ ହୋଇଥାଏ ମୃତ୍ୟୁ କାରଣ |
କେତେକ ଯୁବକ ମାଧ୍ୟମ ବୟସ୍କ ମାନିଲେନି କାହା ବାରଣ,
ଔଷଧ ମିଳୁନି ଶୁଣି ଅସହାୟ ଭୟରେ ଲଭିଲେ ମରଣ |
କରୋନା ଯୋଦ୍ଧା ଯେ ସାହସ ଦେଖାଇ ଲଢ଼ିଲେ ଭୂତାଣୁ ସହିତ,
ଆମାନିଆଁ କିଛି ନିୟମ ନ ମାନି ମାଡ଼ଖାଇ ହେଲେ ଆହତ |
ଅସଲ ଯୋଦ୍ଧା ହିଁ କୋଭିଡ଼ ପୀଡିତ ଯିଏ ଦେଖାଇଲେ ସାହସ,
ରୋଗକୁ ହରେଇ ନିଜେ ଜିତିଗଲେ ବିଚାର ନକରି ବୟସ |