କବିବର ରୂପେ ଜନ୍ମ ଆଉ ଥରେ
କବିବର ରୂପେ ଜନ୍ମ ଆଉ ଥରେ
ବିଦ୍ଵାନ ମଣ୍ଡଳୀ ଉତ୍କଳ ସାହିତ୍ୟେ ,
ସେ ନକ୍ଷତ୍ର ପୁଞ୍ଜେ ଉଭା ଦୀପ୍ତିମନ୍ତେ ॥
ଉଜ୍ବଳ ତାରକା ତୁମେ ଉତ୍କଳର ,
ଆହେ ଯୋଗଜନ୍ମା ତୁମେ କବିବର ॥
ବାଲେଶ୍ଵର ଜିଲ୍ଲା କେଦାରପୁର ରେ ,
ଜନ୍ମିଥିଲ ପ୍ରଜ୍ଞା ଆଶ୍ଵିନ ମାସରେ ॥
ଅଦ୍ଭୁତ ଆହ୍ଲାଦ ପ୍ରକୃତି ବର୍ଣ୍ଣନା ,
କମନୀୟ କାନ୍ତି ସୂଚାରୁ କଳ୍ପନା ॥
ରାଧା ନାଥ ଗ୍ରନ୍ଥାବଳୀ ଯେ ତୁମର ,
ସରସ ସୁନ୍ଦର କବିତାରେ ପୁର ॥
ଭାରତଗୀତିକା ଆଉ ମେଘଦୂତ ,
କବିତାବଳୀ ଯେ ରସରେ ପୂରିତ ॥
ବନ୍ଦେ ସର୍ବେଷାଂନୋ ଜନନୀ ଭାରତ ,
ଭାରତଗୀତିକା ଅଟେ ଶ୍ରେଷ୍ଟ କୃତ ॥
ପବନ କବିତା ବର୍ଣ୍ଣନା ସମୀର,
କୋଇଲି ବସନ୍ତ ଭ୍ରମର ର ସୁର ॥
ବୃକୋଦର ହସ୍ତେ ବଧି ଦୁଃଶାସନ,
ବେଣୀ ସଂହାର ରେ କରିଲ ବର୍ଣ୍ଣନ ॥
ବିରହ ଗୀତିକା ପ୍ରେମିକ ପ୍ରେମିକା ,
କେଦାରଗୌରୀରେ କରିଅଛ ଲେଖା ॥
ଚନ୍ଦ୍ରଭାଗା କାବ୍ୟେ କୋଣାର୍କ ମନ୍ଦିର ,
ଶାପ ଗ୍ରସ୍ତେ ଶିରୀ ତୁଟିଲା ଅର୍କ ର ॥
ନନ୍ଦିକେଶ୍ଵରୀ ଓ ପାର୍ବତୀ ଚିଲିକା ,
ନୀଳ ଊର୍ମିମାଳେ ଶୋଭଇ ମାଣିକା ॥
ମହାଭାରତ ର ସେ ମହାପ୍ରସ୍ଥାନ ,
ମହାଯାତ୍ରା କାବ୍ୟେ କରିଛ ବର୍ଣ୍ଣନ ॥
ଯଯାତିକେଶରୀ ତୁଲସୀ ସ୍ତବକ
ସାବିତ୍ରୀଚରିତ୍ର କବିତା ଅନେକ ॥
ମହେନ୍ଦ୍ରଗିରି ଦଶରଥବିୟୋଗ,
ରାମଙ୍କ ବିହୁନେ ଚାଲିଗଲେ ସ୍ଵର୍ଗ ॥
ପୁଲିସ କୁଳିଶ ପାଦ ଚଟା ନର,
ତାଙ୍କ ପାଇଁ ଶିକ୍ଷା ଲେଖା ଦରବାର ॥
ଅଗାଧ ପାଣ୍ଡିତ୍ୟ ଜ୍ଞାନର ସାଗର ,
ସେଲାଗି ଉପାଧି ହେଲା କବିବର ॥
ଉତ୍କଳୀୟ ଅଳି ତୁମ ଜୟନ୍ତୀ ରେ,
କବିବର ରୂପେ ଜନ୍ମ ଆଉ ଥରେ ॥