କାଶତଣ୍ଡୀ

ଆସିଛି ଶରଦ ସ୍ୱଚ୍ଛ ସୁନିର୍ମଳେ

ହସେ ଫୁଲ କାଶତଣ୍ଡୀ

ନଈକୂଳ ପଠା ବେଣା ପାଟ ହିଡେ

ଦିଶେ ଦିଗନ୍ତ ବିସ୍ତାରି ।

ସବୁଜ ସୁନ୍ଦର ପ୍ରକୃତି ରାଣୀର

ଅନିନ୍ଦ୍ୟ ଶୋଭା ଭଣ୍ଡାର

ଦେଖଣାହାରୀର କିଣିନିଏ ମନ

ଅପୂର୍ବ ସୃଷ୍ଟି ଅନନ୍ୟ ।

ଜଗତ ଜନନୀ ଶାକମ୍ବରୀ ଦୁର୍ଗେ

ସିଂହର ପୃଷ୍ଠରେ ଚଢ଼ି

ଧରାବତରଣ କରନ୍ତି ଆନନ୍ଦେ

ଶୁଭେ ଶଙ୍ଖ ଜୟ ଧ୍ୱନି ।

ଅସୁରୀ ଶକ୍ତିର ହୁଅଇ ବିନାଶ

ଦେବୀଙ୍କ ଶୁଭ ଆଶିଷେ

ନିର୍ମଳ ଚନ୍ଦ୍ରରୁ ଝରି ପଡେ ସତେ

ଅମୃତ କଣ ମରତେ ।

ସ୍ୱଚ୍ଛ ସରୋବରେ ବିକଶେ କମଳ

ନାନା ଜାତି ଫୁଲ ଫୁଟେ

ଶୁଭ୍ର କାଶତଣ୍ଡୀ ସ୍ୱାଗତ ସଙ୍ଗୀତ

ଗାଉଥାଏ ମୁକ୍ତ କଣ୍ଠେ ।

ତା ସହ ଦୋହଲେ ବିଭୋର ମାନସ

ପ୍ରାଣ ହୁଏ ଉଲ୍ଲସିତ

ଅମୃତ ସନ୍ତାନ ନିଷ୍ଠା ଭକ୍ତି ପୂତେ

ଧର୍ମ କର୍ମେ ହୁଏ ରତ ।

 *****