କାମନାର ବିନାଶରେ ଦୁଃଖର ବିନାଶ

ମାନବ ଜୀବନ ମୋହଗ୍ରସ୍ତ ପ୍ରାଣ

ମାୟା ମୋହେ ସର୍ବେ ବନ୍ଧା,

କାମନାର ଜାଲ ବୁଣି ଚାଲିଥାନ୍ତି

ସତେକି ଜାଲରେ ଛନ୍ଦା ।

କାମନାର କେବେ ଶେଷ ତ ନଥାଏ

ଏକପରେ ଆନ ଆସେ,

କେବେ ପୂର୍ଣ୍ଣ ହୁଏ କେବେ ହୁଏ ନାହିଁ

ହତାଶା ମନକୁ ଗ୍ରାସେ ।

କାମନା ବିନାଶେ ଦୁଃଖର ବିନାଶ

ବୁଦ୍ଧଦେବଙ୍କର ବାଣୀ,

ବୁଝିଥିଲେ ଏହା ଅଯଥାରେ ମନ

ହେବ ନାହିଁ କେବେ ଗୁଣି ।

ବୁଦ୍ଧଦେବଙ୍କର ଚାରି ସତ୍ୟ ମଧ୍ୟେ

ତୃତୀୟେ ଏହାର ସ୍ଥାନ,

କାମନା ରହିତ ହୋଇଲେ ଜୀବନ

ଶାନ୍ତିରେ କଟଇ ଦିନ ।

ଯାହା ପ୍ରଭୁଦେଲେ ତହିଁରେ ସନ୍ତୁଷ୍ଟ

ରହିବ ମନଟି ଯେବେ,

ଅଯଥା କାମନା ମନରେ ଆମର

ସୃଷ୍ଟି ହେବ ନାହିଁ କେବେ ।

ମାନବ ଜୀବନ ଅଢେଇ ଦିନର

ଆଜି ଅଛି କାଲିନାହିଁ,

ଧନ ସମ୍ପଦର ଠୁଳ ପାଇଁ କେବେ 

କାମନା ବଢାଅ ନାହିଁ ।

କାମନା ଅଟଇ ଅତି ଭୟଙ୍କର

ନାଶ କରେ ବୁଦ୍ଧି ଶୁଦ୍ଧି,

କାମନା ଯୋଗରୁ ନାନା ଅପରାଧ

ସମାଜରେ ହୁଏ ବୃଦ୍ଧି ।

ଅତିରିକ୍ତ କାମନା ମନରେ ନ ଆଣି

ଦୂରେଇ ରହିବା ଶିଖ,

କାମନା ବିନାଶରେ ଦୁଃଖ ବିନାଶ

ବାଣୀଟିକୁ ମନେରଖ ।