ହେ ନେତାଜୀ !
ହେ ନେତାଜୀ !
ହେ ନେତାଜୀ !
ମରି ନାହଁ ତୁମେ ମରି ପାରିବନି
ବଞ୍ଚିଛ ତୁମେ ଆଜି।
ହେ ନେତାଜୀ ।
ତବ ଆଗମନେ ନବ ଯୁବାପ୍ରାଣେ
ସଂଚିଲା ନୂଆଁ ଆଶା,
ନିର୍ଭୀକତା ତବ ବଦଲାଇ ଦେଲା
ଜାତିପ୍ରେମ ପରିଭାଷା।
ହାରି ଗୁହାରିର ଯୁଗ ସରିଗଲା
ଅସ୍ତ୍ର ଧରିଲ ମାଜି,
ହେ ନେତାଜୀ ।
ରକ୍ତ ଦିଅ,ମୁଁ ସ୍ୱାଧୀନତା ଦେବି
ଚାଲରେ ଦିଲ୍ଲୀ ଚାଲ,
ସ୍ୱାଧୀନତା ଆମ ଜନ୍ମ ଅଧିକାର
ଚାପୁଡ଼ା ଖାଇବ ଗାଲ ?
ତୋଷାମଦ,ତେଲ,ମାଡ଼ଖିଆ ଛାଡ଼ି
ରଖିଲ ଜୀବନ ବାଜି,
ହେ ନେତାଜୀ ।
ବଜ୍ରଘୋଷ ତବ ଯୁବକ ପରାଣେ
ଉନ୍ମାଦ ଦେଲା ଭରି,
ଆଜାଦ୍ ହିନ୍ଦ୍ ଫୌଜ୍ ଗରଜି ଉଠିଲା
ଗୁଳି ବନ୍ଧୁକ ଧରି।
ବ୍ରିଟିଶ୍ ଶାସନ ପ୍ରମାଦ ଗଣିଲା
ଅହମିକା ଗଲା ଭାଜି,
ହେ ନେତାଜୀ ।
ଇମ୍ଫାଲ ବକ୍ଷେ ଉଡ଼ାଇଲ ତୁମେ
ପ୍ରଥମେ ତ୍ରିରଙ୍ଗା ବାନା,
ଗୋରା ସରକାର ଛାନିଆଁ ହୋଇଲା
ଗରବ ହୋଇଲା ଚୁନା।
ସ୍ୱାଧୀନତାର ପଥ ଖୋଲିଦେଲ
ଅଗ୍ର ସୈନିକ ସାଜି,
ହେ ନେତାଜୀ ।