କାଳରାତ୍ରୀ

ଖୋଲିଦିଅ ଦ୍ୱାର ସିଦ୍ଧିପ୍ରଦେ ଦେବୀ

କାଳରାତ୍ରୀ ଶୁଭଙ୍କରୀ

ବରଦ ମୁଦ୍ରାରେ ବିରାଜ ତ୍ରିନେତ୍ରା

ଚର୍ତୁଭୂଜା ଦିଗମ୍ବରୀ ।

ନିଶୁମ୍ଭ ଶୁମ୍ଭଙ୍କ ନିପାତ ନିମନ୍ତେ

ଆରକ୍ତା ଗାଢ଼ ବିବର୍ଣ୍ଣା

ଭଦ୍ରା ମହାକାଳୀ ଭୟଙ୍କରୀ ମାତେ

ଖରାରୁଢା କୃଷ୍ଣବର୍ଣ୍ଣ। ।

ଗଳେ ମୁଣ୍ଡମାଳ ଶୋହେ ବାମହସ୍ତେ

ଲୌହର ଖଡ୍ଗ ଅଙ୍କୁଶ

ସ୍ମରଣ ମାତ୍ରକେ ଭୂତ ଓ ପିଶାଚ

ଅଗ୍ନିଭୟ ହୁଏ ନାଶ ।

ଧ୍ୟାୟନ୍ତି ଭକତ ମନ ଯୋଗବଳେ

ସପ୍ତମ ଦିବସ ଦିନ

ଜାଗ୍ରତ ହୁଅଇ ଚକ୍ର ସହସ୍ରାର

ଶନିଶ୍ଚର ନିୟନ୍ତ୍ରଣ ।

ନାଶ ହୁଏ ଶତ୍ରୁ ରୋଗଶୋକ ଦୁଃଖ

ଅଭୟ କର ପ୍ରଦାନ

ଦୂର ହୁଏ କାଳ ଖର ବିକଟାଳ

ସ୍ମରିଦେଲେ ଶୁଭନାମ ।

ମାତାଙ୍କ ଆଶିଷେ ପୁରୁ ମନସ୍କାମ

ହେଉ କାର୍ଯ୍ୟ ସର୍ବସିଦ୍ଧି

ଭରିଯାଉ ପ୍ରାଣେ ଉଲ୍ଲାସ ଆନନ୍ଦ

ଶୁଭେଚ୍ଛା ଜଣାଉଅଛି ।