କାଳିଆଧନର ମନ ଉଚ୍ଛନ୍ନ

ଶେଷ ହେବ ଆସି ଶ୍ରାବଣ ମାସ 

ରକ୍ଷାବନ୍ଧନ ପରବ ବିଶେଷ ।

ମାସ ଶେଷଦିନ ଆସିବ ପରା

ଭାଇ ଭଉଣୀଙ୍କ ସୁଖ ଆସରା।

କାଳିଆଧନର ମନ ଉଚ୍ଛନ୍ନ 

ପାଖେଇ ଆସିଲା ରକ୍ଷାବନ୍ଧନ ।

ଗେହ୍ଲେଇ ଭଉଣୀ ସୁଭଦ୍ରା ଆସି 

ରାକ୍ଷୀ ବାନ୍ଧିବ ନିଶ୍ଚେ ହସି ହସି।

ବଢାଇବେ ହାତ ଜଗା ବଳିଆ 

ରାକ୍ଷୀ ବାନ୍ଧିଦେବେ ସୁଭଦ୍ରା ମାଆ ।

ଭାଇ ଭଉଣୀଙ୍କ ସ୍ନେହ ବନ୍ଧନ 

ଦେଖ ସଦା ରହିଅଛି ଅମ୍ଳାନ ।

ସବୁ ବରଷ ସୁଭଦ୍ରା ଭଉଣୀ

ରାକ୍ଷୀ ବାନ୍ଧୁଛନ୍ତି ହାତରେ ଆଣି ।

ଚକ୍ରଧାରୀ ଭାଇ ମୂଷଳଧାରୀ 

ରାକ୍ଷୀ ବନ୍ଧା ହୁଏ ହସ୍ତେ ତାଙ୍କରି ।

ସାରା ଜଗତର କରତା ଯିଏ 

ହାତରେ ତାଙ୍କ ରାକ୍ଷୀ ବନ୍ଧା ହୁଏ ।

ସୁଭଦ୍ରା ହରଷେ ବାନ୍ଧନ୍ତି ରାକ୍ଷୀ 

ରହିଥାଏ ରାକ୍ଷୀ ସଭିଙ୍କ ସାକ୍ଷୀ ।

ରକ୍ଷାକର୍ତ୍ତା ଜଗା ବଳିଆ ଭାଇ 

ସୁଭଦ୍ରାଙ୍କ ମାନ ରଖନ୍ତି ସେହି ।

ସୁଭଦ୍ରା ରଖନ୍ତି ଦୁହିଁଙ୍କ ମାନ 

ରାକ୍ଷୀ ଅଛି ସାକ୍ଷୀ ସ୍ନେହ ବନ୍ଧନ ।

ଯୋଗମାୟା ସୁନାନାକୀ ଭଉଣୀ 

ଭାଇ ଯାର ହଳୀ ସାରଙ୍ଗପାଣି ।

ରତନ ବେଦୀରେ ବେନି ପାରୁଶେ 

ବିଜୟ ସର୍ବଦା ମନ ହରଷେ ।

ଯାତ ଉତ୍ସବ ସେ ଯାହା କରନ୍ତି 

ଭଉଣୀକୁ ସଙ୍ଗେ ନେଇ ଯାଆନ୍ତି ।

ଏମିତି ଭାଇ ଭଉଣୀ ସଂସାରେ

ଅଛନ୍ତି କି କେବେ ଭାବ ମନରେ ।

କି ଯୋଗ ପଡିଛି ଦେଖ ସଭିଏଁ 

ବଳଭଦ୍ର ଜନ୍ମ ସେଦିନ ହୁଏ। ।

କାଳିଆଧନର ମନ ଉଚ୍ଛନ୍ନ

ପାଖେଇ ଆସୁଛି ରକ୍ଷାବନ୍ଧନ ।