କାଳିଆ ତୋ ଭାବରେ ବନ୍ଧା

ଜ୍ବରରୁ ଭଲହେଇ କାଳିଆ

    ଘରୁ ଆସିଲ ବାହାରି

ଦର୍ଶନ ଦେବାକୁ ଆକୁଳ 

    ପ୍ରିୟ ଭକ୍ତଙ୍କୁ ସବୁରି

ତୁମେ ବାହାରିଛ ଆଜି

    ଦୁଇଟି କାମ ରେ 

ଭାଇ ଭଉଣୀଙ୍କୁ ଘେନି

    ନନ୍ଦିଘୋଷ ରଥରେ

ମାଉସୀ ଘର ବୁଲା ଆଉ

   ପୋଡପିଠା ଖାଇବାରେ

 ସମୟ ବିତେଇବ ପୁଣି 

    ଅଗଣିତ ଭକ୍ତ ଗହଣରେ

 ବାଟରେ ଭେଟିବ ପ୍ରଭୁ

    ବିଭିନ୍ନ କଳା କୁଶଳୀ ଭକ୍ତ

 କୀର୍ତ୍ତନ କରୁଥିବେ, ପୁଣି

    କିଏ ଥିବେ ନୃତ୍ୟ ରତ 

 ଗୋଟିପୁଅ ନୃତ୍ୟ ଆଉ

  ଥିବେ ଓଡ଼ିଶୀ ନୃତ୍ୟାଙ୍ଗନା

 ପାଇକ ପୁଅ ମାନେ

   କରୁଥିବେ ଅସୀ ଚାଳନା 

 ଫଳଫୁଲ ନଡ଼ିଆ ଆଦି

   ଭୋଗ ଡାଲାରେ ରଖି

 ଅପେକ୍ଷା କରିଥିବେ ଜନେ

    ନେଇ ସଜଳ ଆକ୍ଷି

 ଯିଏବି ତୁମକୁ ଖୋଜେ 

    ନୀରଭିଜା ନୟନେ

 ସେ ଭକ୍ତ ମନୋବାଞ୍ଛା 

   ପୂରଣ କରୁଛ ତକ୍ଷଣେ 

 ଭକ୍ତ ପାଇଁ ତୁମର ଯଦି

   ଏତେ ଆନ୍ତରିକ ଭାବନା

 କୁହପ୍ରଭୁ ମୋପାଇଁ କାହିଁ

    ଊଣାକର ତୁମ କରୁଣା

 ଜଗନ୍ନାଥ ତୁମେ ପରା

    ପ୍ରେମ ଭାବର ଠାକୁର

 ମୋ ପାଖେ ବୋଧେ

    ଅଭାବ ସେ ଭାବର

 ମାଗୁଛି ଆଜି ମୁହିଁ ତୁମକୁ

    ହେ କାଳିଆ ଠାକୁର

 ତୁମ ପାଇଁ ରହୁ ସଦା

   ମୋ ଭକ୍ତିଭାବ ନିରନ୍ତର ।