କାଳିଆ ପାଖକୁ ଚିଠି
କାଳିଆ ପାଖକୁ ଚିଠି
କାଳିଆରେ !
କେତେ ଦିନରୁ ଭାବୁଥିଲି
ତୋ' ପାଖକୁ ଲେଖିବି ଚିଠି ଖଣ୍ଡିଏ,
ଭାବି ଭାବି
ଆଜି ଆରମ୍ଭ କରିଲି ଲେଖା,
ଚିଠିରେ ପଚାରିବିନି ତୋତେ ,
କେମିତି ଅଛୁ ବୋଲି ,,,
ମୁଁ ପରା ପିଲାଟି ଦିନରୁ ଦେଖିଆସୁଛି,
ତୁ ଭକ୍ତ ବିନୋଦିଆ ଭାବଗ୍ରାହୀ ,
ଭକ୍ତମାନେ ତୋ' ପାଖକୁ ନ ଗଲେ
ବିଳପି ଉଠେ ତୋ' ହୃଦୟ,
ଆଉ ଏ ତାଲାବନ୍ଦ କାଳରେ
ତୁ ବି ତ ବନ୍ଦୀ ,
ବିନା ଭକତରେ କାହାକୁ କହୁଥିବୁ !
ତୋ ମନର କଥା,
ତୋ ହୃଦୟର ବ୍ୟଥା ,
ସେ ଯାହା ବି ହେଉ
ତୁ ଟିକେ ବି ମନ ଦୁଃଖ କରନା,
ଆଗକୁ ତୋ' ରଥାଯାତ୍ରା ଆସୁଛି
ବୁଲିଯିବୁ ପରା ଜନ୍ମ-ବେଦୀକୁ,
କ'ଣ ସବୁ ସଜବାଜ ସରିଲାଣି ତ !
ତୋ ମନ କ'ଣ ଦୁଃଖ କି ?
ଏଇ ରଥରେ ବି
ତୋ' ଭକ୍ତମାନେ ଆସିବେନି ବୋଲି,
ତୁ ପରା ,
କୋଟି କୋଟି ଭକ୍ତଙ୍କ ପ୍ରାଣର ଦେବତା,
ତୋ ହୃଦୟରେ
ସବୁବେଳେ ରୁହନ୍ତି ଭକ୍ତମାନେ ,
କହିଲୁ ଦେଖି ,
ଦଇତାମାନେ ତୋ' ଦେହେ ,
ଘସି-ମାଜି ନ ହେଲେ
ଟିକେ ଟାହିଆ ନ ଛିଣ୍ଡିଲେ,
ଶ୍ରୀ ଅଧରେ ମୃଦୁ-ମନ୍ଦ ହସ ,
ଦେଖା ନ ଗଲେ ,
କେଉଁ ଓଡ଼ିଆଙ୍କୁ ,
ରାତିରେ ନିଦ ହେବ କହିଲୁ ,
ସଂସାରରେ ଯାହା ହେଉ ଜଗା ,
ତୁ ଏମିତି ହିଁ ହସୁଥା ,
କୋଟି ପ୍ରାଣର ଦେବତା ସାଜି ,
ବଡ଼ଦାଣ୍ଡରେ ଏମିତି ହିଁ ପ୍ରତିବର୍ଷ
ଗଡୁଥାଉ ତୋ' ନନ୍ଦିଘୋଷ ,,