କାହାର ଅଛି ତିନୋଟି ଡେଣା

କାହାର ଅଛି ତିନୋଟି ଡେଣା

        ଭାବିଲେ ଲାଗେ ବିସ୍ମୟ,

ନରର ଅଛି ଦୁଇଟି ଡେଣା

         କିଏ ତାକୁ କଲା ଜୟ l (1)

ଦୁଇ ଡେଣା ଦ୍ୱାରା କାର୍ଯ୍ୟ କରେ

         ପେଟକୁ ପୋଷିବା ପାଇଁ,

ଅନ୍ୟଜଣେ କରେ ତିନି ଡେଣାରେ

          ନିଜର ପେଟକୁ ନାହିଁ l(2)

ହାତ ଥିଲେ ପରା ଭାତ ମିଳେ

         ଏକଥା ଅଟଇ ସତ,

ପରିଶ୍ରମ ପାଇଁ ଜୀବନକୁ

         ଗ୍ରହଣ କରିଛି ବ୍ରତ l (3)

ନର କାମ କରି ଦୁଇ ହସ୍ତେ

          ଉପାର୍ଜନ କରେ ଧନ,

'ସେ' କାମ କରି ତିନି ଡେଣାରେ

          ନରକୁ ଦିଏ ପବନ l (4)

ମନୁଷ୍ୟ ଯାହା ଆଦାୟ କରେ

       ଧୀରେ ଧୀରେ ଯାଏ ସରି,

ଇଏ ଯେଉଁ ଧନ କରେ ଆଦାୟ

          ପୃଥିବୀ ହୁଅଇ ଭାରି l (5)

ତିନୋଟି ଡେଣା ଥାଇ ତାହାର

        ଅଟେ କୃତ୍ରିମ ପଦାର୍ଥ,

ମନୁଷ୍ୟ ଦ୍ୱାରା ନିର୍ମିତ ହୋଇ

         'ସେ' କିଣଇ ଦେଇ ଅର୍ଥ l (6)

ଦୁଇ ଡେଣାକୁ ସକ୍ରିୟ କରେ

          ତା 'ର ମୁଣ୍ଡର ବ୍ରେଇନ,

ତାର ତିନି ଡେଣା ଘୁରିଥାଏ

         କରିଲେ ସୁଇଚ ଅନ l (7)

ତିନି ଡେଣାକୁ ଘୁର୍ଣ୍ଣନ କରି

         ଆଦାୟ କରେ ସମୀର,

ତାହାକୁ ପାଇ ମାନବ ଜାତି

          ଗ୍ରୀଷ୍ମକୁ କରନ୍ତି ଦୂର l (8)

ଖରାଦିନେ ବେଶୀ ଶ୍ରମ କରି

         ଆଦାୟ କରେ ପବନ,

'ଏ' ଦିନେ ଚାହିଦା ବେଶୀ ତାର

           ଦାମ ଅତି ମୂଲ୍ୟବାନ l (9)

ମୋ ଜନ୍ମ ଦାତା, ମୋ ସୃଷ୍ଟି କର୍ତା

           ପ୍ରଭୁ ମୋର ବୈଜ୍ଞାନିକ,

କେତେ କଷ୍ଟରେ କରିଛ ନିର୍ମାଣ

         ରଖିବି ତୁମର ଟେକ l (10)

ସଭିଏ ଜାଣିଛ ମୋର ନାମ

          ସଭିଙ୍କ ଘରେ ମୁଁ ଥାଏ,

ବିଦ୍ୟୁତ ଦ୍ୱାରା ପରିଚାଳିତ

         କହିବ ମୋ ନାମ କିଏ ? (11)