କିଏ ଆଣି ଦେବ ମୋ ପିଲାଦିନ
କିଏ ଆଣି ଦେବ ମୋ ପିଲାଦିନ
କିଏ ଆଣିଦେବ ମୋ ପିଲାଦିନ
ବସି ବସି ମୁହିଁ ଭାବେ ସପନ l
ଫେରନ୍ତା କି ମୋର ପିଲା ବୟସ
ଅଧୁରା କାର୍ଯ୍ୟକୁ କରନ୍ତି ଶେଷ ll
ବେତ, ଜାମୁ, କ୍ଷୀରି କୋଳି ଖାଆନ୍ତି
ଆମ୍ବର ଡାଳରେ ଦୋଳି ଖେଳନ୍ତି l
ଘାସବାଡି ଖେଳ ଖରାରେ ଖେଳି
ପିଟା ପିଟି ହୋଇ ଖୁସିରେ ମେଳି ll
କେନାଲ ପାଣିରେ ବୁଡିକି ରହି
ଛୁଆଁ ଛୁଇଁ ଖେଳ ମନକୁ ମୋହି l
ସାଇକେଲ ଟାର ଧରି ଦୌଡନ୍ତି
ଗ୍ରାମର ଦାଣ୍ଡରେ ନିତି ଗଡ଼ନ୍ତି ll
ସ୍କୁଲକୁ ଯିବାକୁ କରନ୍ତି ମନା
ମୁଣ୍ଡରେ ଆଣିକି କେତେ ବାହାନା l
ବରଷା ପାଣିରେ ଓଦା ହୋଇକି
କାଗଜ ଡ଼ଙ୍ଗାକୁ ଜଳେ ଛାଡିକି ll
ସାଙ୍ଗସାଥି ହୋଇ ଭୋଜି କରନ୍ତୁ
ଦୋଳ ଧରି କାନ୍ଧେ ଦାଣ୍ଡେ ଚାଲନ୍ତୁ l
ଅଜା ଆଈ ସଙ୍ଗେ ଯାତ୍ରାକୁ ଯାଇ
ଖେଳନା କିଣନ୍ତୁ ପଇସା ଦେଇ ll
ଅଫେରା ବାଟରେ ଆମେ ନାଉରୀ
ଆସିବନି ଆଉ ସମୟ ଫେରି l
ଏବେ ନାହିଁ ଆଉ ସେକାଳ ବେଳ
ଖେଳ କୁଦ ନାହିଁ ସାଥୀଙ୍କ ମେଳ ll
ଖାଲି ପାଠପଢା ବନ୍ଦୀ ଜୀବନ
ଦରକାର ନାହିଁ ମୋ ପିଲାଦିନ l
ନାହିଁ ଭାଇଚାରା ଉଦାସ ମନ
ସମୟ ଗର୍ଭରେ ସବୁ ବିଲୀନ ll