ପାର୍ବଣର ଋତୁ ଆସିଲାଣି

ପାର୍ବଣର ଋତୁ      ଆସିଲାଣି ଏବେ

     ସଜେଇ ହେଲାଣି ଧରା

ସୁନୀଳ ଆକାଶେ    ଶରତ ଜହ୍ନଟା

    ଦିଶିଲାଣି ଭାରି ତୋରା  ।

ନଇକୂଳେ ଫୁଟି     କାଶତଣ୍ଡି ଫୁଲ

    ଖୁସିମନେ ଝୁମିଲାଣି

ଦୂର ଆକାଶକୁ      ପକ୍ଷୀଗଲେ ଉଡି

     କଳରବ ଶୁଭିଲାଣି    ।

ଆସିବେ ଧରାକୁ     ଭୂବନମୋହିନୀ

    ମଣ୍ଡପ ହେଲାଣି ସଜା

ଗାଆଁଠୁ ସହର       ଉତ୍ସବ ମୂଖର

     ବାଜି ଉଠିଲାଣି ବାଜା  ।

ତୁମର ଆଶିଷ       ଢ଼ାଳିଦିଅ ମାଆ

     ଶାନ୍ତିଭରୁ ଧରଣୀରେ

ଅଶାନ୍ତି ଅନ୍ୟାୟ      ଈର୍ଷା ହିଂସା ଭାବ

     ଅପସରି ଯାଉ ଧିରେ  ।

ସୁନ୍ଦର ଶାଳିନୀ      ସବୁଜ ଧରଣୀ

      ଆଶ୍ଵିନରେ ହସିଲାଣି

ମାଆ ଆଗମନେ     ସ୍ଵାଗତ ପାଇଁକି

     ଫୁଲହାଟ ବସିଲାଣି  ।

ସ୍ୱଚ୍ଛ ନିରିମଳ        ନଦୀ ନାଳ ଜଳ

      ଶରତ ଋତୁରେ ଦିଶେ

ଆକାଶ ଛାତିରେ      ତାରାଗଣ ମେଳେ  

      ତୋଫା ଜହ୍ନ ଉଇଁ ହସେ  ।

ଦଶହରା ପର୍ବ       ଗଜଲକ୍ଷ୍ମୀ ପୂଜା

     ଆସିଲେ ଆନନ୍ଦ ଲାଗେ

କୁମାର ପୂର୍ଣ୍ଣମୀ      କୁଆଁରୀ ମାନଙ୍କ

     ମନେ ନୂଆ ଆଶା ଜାଗେ  ।