କାଗଜଡଙ୍ଗା
କାଗଜଡଙ୍ଗା
କାଗଜ ଡଙ୍ଗାର କେତେବା ଆୟୁଷ
ବୁଝି ମୁଁ ପାରୁଛି ଏବେ ;
ବରଷା ଟୋପାରେ ଭିଜି ଲୀନ ହୁଏ
ସତ୍ତା ତା'ର ଅନୁଭବେ !!
ମୋ' ହାତ ତିଆରି ଛୋଟ କାରିଗରୀ
କାଗଜ ନିର୍ମିତ ନାଆ. ;
ବରଷା ପାଣିରେ ଭାସିଭାସି ଯାଏ
ଗାଇ ଗାଇ ମୋର ନାଆଁ !!
ଚପଳ ବୟସେ ସାଙ୍ଗ ସାଥୀ ମେଳେ
ଗାଆଁ ଦାଣ୍ଡେ ଭିଡ ଜମେ ;
କାହା ଡଙ୍ଗା ଆଗେ କାହା ଡଙ୍ଗା ପଛେ
ସଭିଏଁ ପଡନ୍ତି ଭ୍ରମେ !!
ସ୍ମୃତିଚାରଣର ଏ ମହା ଅନୁଭବ
ମନେ ଆଣେ ପ୍ରଶ୍ନବାଚୀ ;
ଚପଳ ବୟସେ ଥିଲି ମୁଁ କୁଶଳେ
ନୌକାବାହି ପ୍ରତିଯୋଗୀ !!
ଓଡ଼ିଆ ସଂସ୍କୃତି ବିଭବର ଛବି
ନୌକା ସଙ୍ଗେ ଅଙ୍ଗାଅଙ୍ଗି ;
ସାଧବ ପୁଅର ବଣିଜ ବେପାର
ଦରିଆ ପାରିରେ. ଭାଗୀ !!
ଉତ୍କଳ ମାହାତ୍ମ୍ୟ ସାଧବ ବଣିକ
ବୋଇତ ବନ୍ଦାଣ ପର୍ବ ;
କାର୍ତ୍ତିକ ପୂର୍ଣ୍ଣିମା ପରବ ସଂହିତା
ଅନୁଭୂତ ହୁଏ ଗର୍ବ !!
ସ୍ନେହ ସଦିଚ୍ଛାର କରୁଣା ଅପାର
ସ୍ମୃତିର ବାହକ ଡଙ୍ଗା;
ଟଳମଳ ହୋଇ ବୁଡ଼ିଯିବୁ ନାହିଁ
ମନରେ ନ ଆସୁ ଶଙ୍କା !!
ପୂରୁବ ଗୌରବ ପୂରୁବ ମହିମା
ଉଦ୍ଭାସିତ ହେଉ ସଦା ;
ଯଶ ମାନ ରଖି ସାଜିବା ନାଉରୀ
ଅଚିରେ ପାଳିବା ପ୍ରଥା !!
ସଫେଦ ନରମ ମୋ' ଡଙ୍ଗା କାଗଜ
ଭିଜି ଯାଉ ପଛେ ନୀରେ ;
ବହୁଦୂର ଯାଉ ସିଂଘଳ ଦୀପକୁ
ଇତିହାସ ରଚୁ ବାରେ !!