Library
ଜଣେ ସାମ୍ବାଦିକଙ୍କ ପ୍ରଶ୍ନର ଉତ୍ତର
ଜଣେ ସାମ୍ବାଦିକଙ୍କ ପ୍ରଶ୍ନର ଉତ୍ତର
ଏ କରୋନା କଣ
ଆମେ ବିଶେଷ କିଛି ଜାଣି ନାହୁଁ,
ଆମର ତ ଟିଭି ନାହିଁ,
ଆମେ ଖବରକାଗଜ ବି ପଢୁନାହୁଁ,
ତେଣୁ ଏ କରୋନା କ'ଣ
ଆମେ ବିଶେଷ କିଛି ଜାଣି ନାହୁଁ ।
ହଁ, ଗତ ବର୍ଷ ଶୁଣି ଥିଲୁ !
ନେତା ମନ୍ତ୍ରୀ ବି ଆସିଥିଲେ,
ନାକପାଟିଭିଡା କନା
ଆଉ ହାତଧୂଆ ପାଣି ବାଣ୍ଟିଥିଲେ;
ଦୂରେଇ ଦୂରେଇ ରହିଥିଲେ
କିଲେ ଆଳୁ ଆଉ ଦି କିଲୋ ଚାଉଳ ଦେଇ
ତିନୋଟି ଫଟୋ ବି ନେଇଥିଲେ !
ହେଲେ ଏ ବର୍ଷ ତ
କରୋନା ଫରନା କିଛି ନାହିଁ ।
ଗତ ବର୍ଷ ଗୋବିନ୍ଦା ଭାଇ
ଗାଆଁକୁ ଫେରିଥିଲା,
ସର ମାଉସୀ ଘର ଘର ବୁଲି
ମିଠା ବାଣ୍ଟିଥିଲା,
ହେଲେ ଏ ବର୍ଷ ତ ସେମିତି କିଛି ଘଟୁନାହିଁ,
ବୋଧେ କରୋନା ଆଉ ଆସୁନାହିଁ ।
କିନ୍ତୁ ସହରକୁ ଗଲେ
ଆମେ ନାକ ପାଟି ଢାଙ୍କି ଦେଉ,
ପୋଲିସର ନାଲି ଆଖି ଆଉ
ବେଏଁ ଲମ୍ବର ବାଡିକୁ
ଆମର ଭାରି ଭୟ,
ଆମକୁ ସମସ୍ତେ ଦୂର୍ ଦୂର୍ ମାର୍ ମାର୍ କରନ୍ତି ,
ହେଲେ ଏ ସବୁ କୋଉ ନୂଆ କଥା ଯେ !
ସତରେ ବାବୁ !
ଏ କରୋନା କ'ଣ
ଆମେ ବିଶେଷ କିଛି ଜାଣି ନାହୁଁ
ଆମର ତ ଧନ ନାହିଁ
ଆମେ ପାଣି ଆଉ ପବନ
କେମିତି କିଣିବୁ,
ବେଶି ଆଉ ପଚାରନି ବାବୁ ।
ଏ କରୋନା କଣ
ଆମେ ବିଶେଷ କିଛି ଜାଣି ନାହୁଁ ।
