ଜଣାଏ ତୁମକୁ ସଲାମ
ଜଣାଏ ତୁମକୁ ସଲାମ
ବିଳପି ଉଠୁଛି ମାଆ ର କଲିଜା
ଥରୁଛି ବାପା ର ଛାତି ।
ଭାଇ ଭଉଣୀଏଁ ମୁଣ୍ଡ ପିଟି କାନ୍ଦେ
ସାଙ୍ଗ ସାଥି ଉଠେ ତାତି ।।
ନିର୍ବାକ ନୟନରେ ଅଶ୍ରୁ ଦୁଇ ଧାର
ମୁଖଟି ମଉଳା ଫୁଲ ।
ମଲା ଛାତି ପରେ ମଥା ପିଟେ ସ୍ତ୍ରୀ
ତଉଲୁଛି ଜୀବନ ମୂଲ।।
ବାଳୁତ ଶିଶୁ ଟି ବୁଝେ ନାହିଁ କିଛି
କାନ୍ଦୁଛି ସେ ରାହା ଧରି ।
କିଏବା ହାରିଛି କାହାକୁ ହାରିଛି
କିଏବା ଯାଇଛି ମରି ।।
କାହା ଭବିଷ୍ୟତ ଉଜୁଡ଼ି ଯାଇଛି
ଦେଶ ଭବିଷ୍ୟତ ପାଇଁ।
କିଏବା ବୁଝୁଛି ଦେଶ ଭବିଷ୍ୟତ
କିଏବା ମାରୁଛି ହାଇ।।
ମହାନ ତୁମେ କହିଦେଲେ ଥରେ
ପୁରି ଉଠିବ କି ସଂସାର ।
କେତେ ବା ବୁଝିଛୁ ତୁମ ମର୍ମ ବ୍ୟଥା
କେତେ ବା ନେଉଛୁ ଖବର।।
ପେଟ ପାଇଁ ଆମେ ସଭିଏଁ ଭାବୁଛୁ
ତୁମକୁ ତ ବଡ଼ ଦେଶ।
ଜୀବନ ଦେଇକି ଦେଶ ମାତୃକାର
ବଢ଼ାଇ ଦେଇଛ ଯଶ ।।
ବୀର ଗତି ପ୍ରାପ୍ତ ହେ ଅମର ଯବାନ
ତୁମକୁ ଜଣାଏ ସଲାମ।
ଅଶ୍ରୁଳ ଶ୍ରଦ୍ଧାଞ୍ଜଳୀ ଏ କଲମ ମୁନେ
କରୁଛି ତୁମକୁ ପ୍ରଣାମ।
ପରେଶ ଚନ୍ଦ୍ର ଦାସ
ଗୋପାଳପୁର,ବାଲେଶ୍ୱର