ଜଳୁଥାଉ ସଞ୍ଜବତୀ

ଓଡ଼ିଶା ସଂସ୍କୃତି ମୋ ସଞ୍ଜବତୀ 

ଘିଅ ଦୀପ ଝୁଣା ଧୂପ

ଚଉଁରା ମୂଳରେ ଭୂମିଷ୍ଠ ପ୍ରଣାମ

ଶୁଭ କଲ୍ୟାଣ ମନାସ ।

ଭଜନ ଜଣାଣ ଛାନ୍ଦ ଚଉପଦୀ

ଭାଗବତ ହରିବଂଶ

ଓଡ଼ିଆଙ୍କ ପ୍ରାଣେ ଭକ୍ତି ଛଳଛଳ

ପ୍ରଗାଢ ଧର୍ମ ବିଶ୍ଵାସ ।

ଜାଳି ସଞ୍ଜବତୀ ସଞ୍ଜୀବେ ମୋ ସ୍ମୃତି

ମୋ ସଂସ୍କୃତି ପରମ୍ପରା

ହସି ଉଠୁ ମୋର ଘର ପରିବାର

ମୋ ରାଇଜ ଦେଶ ଧରା ।

ପୁରୀ ନୀଳାଚଳ ଶ୍ରୀ ପୁରୁଷୋତ୍ତମ

ଧାମ ଗୋଲକ ବୈକୁଣ୍ଠ

ବିଜେ ବଳଭଦ୍ର ଶ୍ରୀ ଦେବୀ ସୁଭଦ୍ରା

ମହାପ୍ରଭୁ ଜଗନ୍ନାଥ ।

ଦଶ ଅବତାର ଗୁଣ୍ଡିଚା ବିଜୟ

ବାହୁଡ଼ା ଦଶମୀ ଯାତ୍ରା

ରଥରେ ବାମନ ଶ୍ରୀ ମଧୁସୂଦନ

ଉତ୍ସର୍ଗ ଅଧର ପଣା ।

ରାଜରାଜେଶ୍ଵର ଶ୍ରୀ ଜୀଉମାନଙ୍କ

ହୁଏ ଦିବ୍ୟ ସୁନାବେଶ

ଥାଟବାଟ ଭାଙ୍ଗେ ଭକତ ଗହଳି

ବଡ଼ ଦାଣ୍ଡ ଲୋକାରଣ୍ୟ ।

ବାରମାସେ ତେର ପରବ ପାଳନ

ଦେବପୂଜା ନିତି କାନ୍ତି

ଶୁଭ ତିଥି ବାର ମେଳା ମହୋତ୍ସବ

ପୂର୍ଣ୍ଣମୀ ଓ ସଙ୍କରାନ୍ତି ।

ମେଷ ଶୁକ୍ଳ ପକ୍ଷ ପ୍ରତିପଦା ତିଥି

ପବିତ୍ର ମହାବିଷୁବ

ପାଳନ୍ତି ଓଡ଼ିଆ ନୂତନ ବରଷ

ନବରାତ୍ର ଅୟରାମ୍ଭ ।

ବାସନ୍ତୀ ଦୁର୍ଗାଙ୍କ ପୂଜା ଆରାଧନା

ହନୁମାନଙ୍କ ଜୟନ୍ତୀ

ମହା ସମାରୋହେ ହୁଏ ଅନୁଷ୍ଠିତ

ହୋମ ପୂଜା ନିତି କାନ୍ତି ।

ରଜ ଦଶହରା ପର୍ବ ନୂଆଖାଇ

ଦୀପାବଳି ଲକ୍ଷ୍ମୀ ପୂଜା

ରଙ୍ଗ ର ଉତ୍ସବ ଦୋଳ ଯାତ୍ରା ମେଳା

ହୋଲି ଖେଳ ଭାରି ମଜା ।

ଐତିହ୍ୟ ସମ୍ପନ୍ନ ଓଡ଼ିଆ ସଂସ୍କୃତି

କୈବଲ୍ୟ ମୁକ୍ତି ଶ୍ରୀ କ୍ଷେତ୍ର

ଅନ୍ନକଣ ଯହିଁ ଶ୍ରୀ ମହାପ୍ରସାଦ

ଦାଣ୍ଡ ଧୂଳି ସୁପବିତ୍ର ।

ଓଡ଼ିଶା ଜୀବନ ପ୍ରଭୁ ଜଗନ୍ନାଥ

ଦାରୁ ଭୂତ ପରଂବ୍ରହ୍ମ

କୃପାକର ନାଥ ଦିଅ ଗତି ମୁକ୍ତି

ଜୟ ଜଗନ୍ନାଥ ଜୟ ।

   ---+++---