ଜୀବନର ପରିବ୍ୟାପ୍ତି
ଜୀବନର ପରିବ୍ୟାପ୍ତି
ଏ ଜୀବନ
କେବେ ମୃତ୍ୟୁର ଯବନିକା
ତ ପୁଣି କେବେ
ଆରମ୍ଭର ପ୍ରଥମ ସୋପାନ l
କେବେ ଆଲୋକର ପ୍ରଥମ ପର୍ବ
ତ ପୁଣି କେବେ
ଅନ୍ଧକାରର ଅନ୍ତିମ ପର୍ଯ୍ୟାୟ l
କେବେ ଭୂମିଷ୍ଠରୁ ଶୈଶବର ଆରୋହଣ
ତ ପୁଣି କେବେ
ବାର୍ଦ୍ଧକ୍ୟର ଅନ୍ତିମ ପର୍ବରୁ ଚିର ବିଦାୟ l
କେବେ କୈଶୋରର ଏକ ରୂପାନ୍ତରିତ ଅବଚେତନ
ତ କେବେ
ଯୌବନର ଏକ ବିକଶିତ ବିବର୍ତ୍ତନ l
ଏ ଜୀବନ
କେବେ ଆଶା ଆଉ ଭରସାର
ଅପେକ୍ଷାରତ ପଥିକଟିଏ
ତ କେବେ
ଏକାକି ବୋଧର ଅସହାୟତାରେ
ନିଃସଂଗ ଆଉ ନିର୍ବିକାର l
ଏ ଜୀବନ
କେବେ ଯାତନାର ଜ୍ୱାଳାରେ ଜର୍ଜରିତ
ତ ପୁଣି କେବେ
ଖୁସି ଆଉ ଆନନ୍ଦରେ ଅଭିନନ୍ଦିତ l
କେବେ ସଫଳତାର ଆତ୍ମତୃପ୍ତିରେ ବିଭୋର
ତ କେବେ
ବିଫଳତାର ଆତ୍ମସମିକ୍ଷାରେ ଅନୁତପ୍ତ l
କେବେ ଆତ୍ମଗ୍ଳାନିର ଅନ୍ତଃର୍ଦାହରେ ବାକ୍ ଶୂନ୍ୟ
ତ ପୁଣି କେବେ
ଆତ୍ମବଡିମାର ବୃଥା ଅହଂକାରରେ ଦିଗହରା l
କେବେ କ୍ଷୁଧାର ଅନ୍ତର୍ଜ୍ୱଳନରେ ଜର୍ଜରିତ
ତ କେବେ
ଅନ୍ନର ପ୍ରାଚୁର୍ଯ୍ୟରେ ସ୍ୱୟଂ ପରିପୂର୍ଣ୍ଣ l
ଆଉ ଏଇତ ଜୀବନର ପରିବ୍ୟାପ୍ତି
କେବେ ସାମର୍ଥ୍ୟର ପରାକ୍ରମରେ
ସଫଳତାର ପ୍ରାପ୍ତି
ତ କେବେ
ଅପାରଗତାର ଅସମର୍ଥତା ଭିତରେ
ବିଫଳତାର ଆତ୍ମ ଯନ୍ତ୍ରଣାକୁ ସହ୍ୟକରି
ଜୀବନ ଜୀବିକାର ତୁମୁଳ ସଂଗ୍ରାମରେ
ଯୁଝି ଯୁଝି
କର୍ମ ଆଉ ଭାଗ୍ୟର ଦୋଛକିରେ
ସବୁଦିନ ପାଇଁ ହୋଇଯାଏ ଇତି l